უარი ძერწვაზე და „რა? სად? როდის?“-ში მონაწილეობაზე - „სოციალური ურჩობისთვის“ დასჯილი მერაბიშვილი და „უდოს“ კომისიის უარი გათავისუფლებაზე

პოლიტიკა - 21:06, 13 May, 2019

1667

სპეციალური პენიტენციური სამსახურის ადგილობრივმა საბჭომ 11 აპრილს საქართველოს ყოფილი პრემიერ-მინისტრისა და შინაგან საქმეთა მინისტრის, ვანო მერაბიშვილის პირობით ვადამდე გათავისუფლების საკითხი განიხილა და მსჯავრდებულს ვადამდე გათავისუფლებაზე უარი ეთქვა. როგორც საბჭოს გადაწყვეტილებაშია ნათქვამი, საბჭო მიიჩნევს, რომ არ მომხდარა მსჯავრდებული ივანე მერაბიშვილის რესოციალიზაცია და არ შეცვლილა მისი დამოკიდებულება მის მიერ ჩადენილი არც ერთი დანაშაულის მიმართ.

საბჭოს გადაწყვეტილებაში, რომელიც "ნიუპოსტმა" მოიპოვა, მოყვანილია სოციალური მუშაკისა და ფსიქოლოგის დასკვენები სადაც გაწერილია თუ რა დამოკიდებულებები აქვს მსჯავრდებულს, მათი თქმით, მერაბიშვილი გრძნობს მხოლოდ პოლიტიკურ პასუხისმგებლობას, რადგან მისი განმარტებით პოლიტიკური ლიდერი ვალდებულია პასუხისმგებლობა აიღოს თავის თავზე, თუმცა არ გრძნობს პასუხისმგებლობას ჩადენილი დანაშაულის გამო.

უწყება ყოფილი პრემიერის ვადამდე გათავისუფლებაზე უარის თქმის დამატებით მიზეზებს ეძებს და მისი არშემდგარი რესოციალიზაციის დასამტკიცებლად ვანო მერაბიშვილის მიერ გამოვლენილ „ურჩობაზე“ საუბრობს და აცხადებს, რომ ვანო მერაბიშვილი მონაწილეობას არ იღებდა სხვადასხვა სოციალურ აქტივობებში, მაგალითად კი ძერწვის კონკურსები და ინტელექტუალური თამაშები მოჰყავს.

დასკვნაში მითითებულია, რომ #9 პენიტენციურ დაწესებულებაში სასჯელის მოხდის განმავლობაში, მსჯავრდებულს არაერთხელ შესთავაზეს სხვადასხვა სოციალურ აქტივობებში მონაწილეობა, თუმცა ყოველ ჯერზე უარს აცხადებდა, ამის მაგალითად კი მოყვანილია ის რომ მერაბიშვილმა არ დაწერა საშობაო თემასთან დაკავშირებით წერილი ან ესსე, არ მიიღო მონაწილეობა ინტელექტუალურ თამაშში „რა? სად? როდის?“ , არ მიიღო მონაწილეობა ხელოვნების კონკურსში, რომელიც სხვადასხვა მასალით ნამუშევრების დამზადებას ითვალისწინებდა და არ მიიღო მონაწილეობა სპორტულ შეჯიბრებებში.

ადვოკატები ვადამდე გათავისუფლების მორიგ უარს, უახლოეს დღეებში სასამართლოში გაასაჩივრებენ.