„ზონანიუსი“ ავრცელებს სასწრაფო ინფორმაციას იმის შესახებ, რომ გუშინ, ღამის საათებში ღამის კლუბ „სენატში“ ორმხრივი სროლის ხმა ისმოდა. 

პორტალს მოჰყავს თვითმხილველის ინფორმაცია იმის თაობაზე, რომ კლუბის იატაკზე სისხლის გუბეები იდგა და, სავარაუდოდ, არიან დაჭრილები. „ზონანიუსის“ ცნობით, შემთხვევის ადგილზე მობილიზებული იყვნენ შსს-ს ქვედანაყოფები.

„როგორც წყარო ჰყვება, ჩხუბი სხვადასხვა სუფრის წევრებს შორის მოხდა, რასაც მალევე ორმხრივი სროლა მოყვა. სავარაუდოდ, არიან დაჭრილები.  გავრცელებული ცნობით, დაპირისპირებული მხარეების  გაშველება კლუბის დაცვის თანამშრომლებმა სცადეს, თუმცა უშედეგოდ. 

ცეცხლსასროლი იარაღის გამოყენება მათაც მოუხდათ. აღსანიშნავია, რომ კლუბში ცეცხსასროლი იარაღის შეტანა აკრძალულია, თუმცა, გავრცელებული ინფორმაციით, ჩხუბის მონაწილეები კლუბში VIP სტატუსით იმყოფებოდნენ და ისინი შესვლისას არავის გაუჩხრეკია“, - წერს „ზონანიუსი“.

„სენატში“ მომხდარი შეიარაღებული დაპირისპირების ფაქტის შესახებ შსს-ს ცნობა ამ დრომდე არ გაუვრცელებია, შესაბამისად, უცნობია, ადასტურებენ თუ არა უწყებაში მომხდარ ფაქტს.