"მე არ შემიმჩნევია ჩემ ირგვლივ მისი გარემოცვა, მთავარია ახლა მტკიცებულებები შეაგროვონ და შემდეგ გააანალიზონ"- გოგაშვილი მაჩალიკაშვილის შესახებ

პოლიტიკა - 14:23, 08 May, 2019

2735

სახელმწიფო უსაფრთხოების სამსახურის მიერ გავრცელებული აუდიოჩანაწერი, სადაც მოკლული თემირლან მაჩალიკაშვილის მამა მალხაზ მაჩალიკაშვილი მის ძმისშვილს სუს-ის უფროსის ყოფილი პირველი მოადგილის თვალთვალს ავალებს - სოსო გოგაშვილი აღნიშნულს „პირველ არხთან“ საუბრისას გამოეხმაურა და განაცხადა, რომ ის არის ობიექტი, რომელზეც შესაძლოა ტერაქტი მომხდარიყო:

„მინდა ხაზი გავუსვა, რომ დანაშაულებრივი გეგმა ვისაც უნდა შეემჩნია, შეამჩნია და ამისთვის დიდი მადლობა სუს-ს. მათ ჰყავდათ დაკვირვების ქვეშ ეს ადამიანი, რადგან საფრთხეს წარმოადგენდა იმ განცხადების შემდეგ, რაც საჯაროდ განახორციელდა, მუქარა იყო ეს, თუ განზრახვა. მე არ შემიმჩნევია ჩემ ირგვლივ მისი გარემოცვა. შემდეგ მითხრეს, რომ უსაფრთხოების ზომები გასაძლიერებელი იყო და რა თქმა უნდა, ყურადღებით ვიყავი და მაქსიმუმს ვაკეთებდი, რომ ოჯახის უსაფრთხოება დამეცვა, რაშიც სახელმწიფოც მეხმარებოდა.

ვერანაირ მითითებას ვერ მივცემ გამოძიებას, რადგან არ ვარ იმ სამსახურში, რომელიც მითითებას იძლევა. მე ვარ ამ შემთხვევაში ობიექტი, რომელზედაც შესაძლებელია, მომხდარიყო ტერაქტი. აქედან გამომდინარე, ველოდები გამოძიების მიმდინარეობას. ძალიან მოზომილი ვარ კომენტარში, არ მინდა, რამით ხელი შევუშალო გამოძიებას. მთავარია, ახლა მტკიცებულებები შეაგროვონ, შემდეგ გააანალიზონ. სუს-მა რაც შეძლო, მოაგროვა, ახლა პროკურატურაზეა დამოკიდებული. ალბათ მიიღებენ გადაწყვეტილებას. დაველოდები გამოძიებას“, – განაცხადა სოსო გოგაშვილმა.