ამერიკის შეერთებული შტატები, ევროსაბჭო და ევროკავშირი აქტიურად მუშაობდა რეკომენდაციებზე, რომლის მთავარი ადრესატი საქართველოს ხელისუფლებაა - აღნიშნულს ევროკავშირის ელჩი კარლ ჰარცელი ადასტურებს.

დიპლომატმა დააკონკრეტა რეკომენდაციები, რომელთა შესრულებაც აუცილებელია. ჰარცელის განცხადებით, აუცილებელია, პროცესში ოპოზიცია და არასამთავრობო სექტორი იყოს ჩართული.

„ვმუშაობთ შეერთებულ შტატებთან და სხვებთან ერთად მთავარ რეკომენდაციებზე, ჩვენ რა უნდა გავაკეთოთ ამ კუთხით. ფუნდამენტური ისაა, რომ გვაქვს ოდირის ანგარიში, სადაც 17 რეკომენდაციაა, რომლებიც სასურველია, იყოს გათვალისწინებული. პირადად სპიკერთან გვქონდა დისკუსია და ყველა ვთანხმდებით, ასე უნდა მოხდეს. არაერთხელ მითქვამს, რომ მნიშვნელოვანია, დისკუსია დაიწყოს ოპოზიციის, არასამთავრობოების ჩართულობით, რომ მიმდინარე წელი საჭირო ცვლილებების განხორციელებისთვის გამოვიყენოთ,“ - განაცხადა კარლ ჰარცელმა.