"ივანიშვილისთვის ის ინსტრუქციები უფრო მნიშვნელოვანია რაც მოსკოვიდან მოდის"- სამადაშვილი ხელისუფლებას აშშ-ს, ევროკავშირისა და ევროსაბჭოს რეკომენდაციების შესრულებას მოუწოდებს

პოლიტიკა - 12:23, 08 May, 2019

611

გაერთიანებული ოპოზიცია - „ძალა ერთობაშიას“ ერთ-ერთი ლიდერი სალომე სამადაშვილი ხელისუფლებას მიმართავს და მოუწოდებს, არჩევნებთან დაკავშირებით ის რეკომენდაციები შეასრულოს, რომელიც ქვეყანას აშშ-მ, ევროკავშირმა და ევროსაბჭომ მისცა.

დღეს გამართულ პრესკონფერენციაზე, საპარლამენტო ოპოზიციის წევრმა განაცხადა, რომ საქართველოს რამდენიმე მაღალი დონის დელეგაცია ეწვია ამერიკის შეერთებული შტატებიდან და ევროპიდან, ვიზიტების მთავარი თემა კი საქართველოში ჩასატარებელი არჩევნების მომავალი იყო.

„ამერიკამ, ევროკავშირმა და ევროსაბჭომ ხელისუფლებას კონკრეტული რეკომენდაციების სია წარუდგინეს, რისი განხორციელებაც უახლოეს კვირებში უნდა დაიწყოს, რომ შემდეგი არჩევნები სამართლიანად და ლეგიტიმურად ჩაითვალოს. ეს გზავნილი იმას ნიშნავს, რომ ბიძინა ივანიშვილს დასავლეთმა უთხრა, რომ თუ საქართველოს სურს ევროპული სახელმწიფო იყოს, დემოკრატიული არჩევნები უნდა ჩაატაროს. ისინი ეუბნებიან იმასაც, რა უნდა გააკეთოს ბიძინა ივანიშვილმა, რომელიც რუსეთიდან იღებს ინსტრუქციებს. სწორედ ამ ინსტრუქციების შესრულებაა მორიგი თავდასხმა „რუსთავი 2“-ზე, მოსამართლეების არჩევა. როგორც ჩანს, ბიძინა ივანიშვილისთვის ის რეკომენდაციები უფრო მნიშვნელოვანია, რაც მოსკოვიდან მოდის, ვიდრე პარტნიორები აძლევენ.

ევროპელი პარტნიორების რეკომენდაციების იგნორირება ქვეყნას იზოლაციაში მოაქცევს. თუ ქვეყანა ამ რეკომენდაციებს არ შეასრულებს, საქართველო უარს იტყვის დასავლურ ინტეგრაციაზე“, – განაცხადა სალომე სამადაშვილმა.