"R2-ის წინააღმდეგ აღმასრულებელი ხელისუფლების ფარგლებში ვერანაირი ცვლილება ვერ დარეგისტრირდება, რადგან სტრასბურგის გადაწყვეტილება ძალაშია"- წულუკიანი

პოლიტიკა - 12:04, 08 May, 2019

904

მორიგი თავდასხმა ტელეკომპანია „რუსთავი 2“-ზე - საკითხზე კომენტარი დღეს იუსტიციის მინისტრმა თეა წულუკიანმა გააკეთა. მინისტრის თქმით, საჯარო რეესტრში ვერანაირი ცვლილება ვერ დარეგისტრირდება, სანამ ტელეკომპანიის საქმე სტრასბურგის სასამართლოშია:

„ვფიქრობ, რაც არ უნდა უკმაყოფილო იყოს „რუსთავი 2“-ის, როგორც კომპანიის ერთ-ერთი მესაკუთრე ნინო ნიჟარაძე სხვა მესაკუთრეებით, ან არ მოსწონდეს მას და სამართლებრივი პრეტენზიები და არგუმენტები ჰქონდეს მისივე კუთვნილი კომპანიის ხელმძღვანელობასთან, მთავარია, ყველას კარგად გვახსოვდეს და გვესმოდეს, რომ ორი წელია, სტრასბურგის სასამართლოს მიერ ე.წ. შეჩერების გადაწყვეტილება, ანუ დროებითი ღონისძიება იქნა მიღებული. ეს გადაწყვეტილება დღესაც ძალაშია. ვერავითარი ტრანზაქცია, იქნება ეს საჯარო რეესტრი, იუსტიციის სამინისტროს რომელიმე სხვა სსიპ-ი ან რომელიმე სხვა საჯარო დაწესებულება აღმასრულებელი ხელისუფლების ფარგლებში, ვერანაირ ნაბიჯს ვერ გადადგამს, სანამ შეჩერების ეს გადაწყვეტილება ძალაშია, სანამ სტრასბურგის სასამართლო არ გამოიტანს თავის გადაწყვეტილებას.

შესაბამისად ჩვენი, სახელმწიფოს მხრიდან არანაირი სიახლე ამ საქმეზე და „რუსთავი 2“-თან დაკავშირებით არ არის. ვფიქრობ, არც ის სამართლებრივი არგუმენტები არის ამ შემთხვევაში ჩვენთვის საინტერესო, რომელიც მე არ ვიცი“, – განაცხადა იუსტიციის მინისტრმა.