„ყველა პრობლემის პირველწყარო ივანიშვილია, ამ პირობებში პოლიტიკური რადიკალიზაცია გარდაუვალი აუცილებლობაა“

„ყველა პრობლემის პირველწყარო ივანიშვილია, ამ პირობებში პოლიტიკური რადიკალიზაცია გარდაუვალი აუცილებლობაა“ - ბაჩუკი ქარდავა რ2-ის საქმეზე

პოლიტიკა - 14:44, 07 May, 2019

857

"რუსთავი 2-ის" საქმესთან დაკავშირებით, გუშინ არხის გენერალური დირექტორის ნიკა გვარამიას მიერ გაკეთებულ განცხადებას ოპოზიციის ლიდერები ეხმაურებიან. ეროვნულ-დემოკრატიული პარტიის თავმჯდომარის და გაერთიანებული ოპოზიციის „ძალა ერთობაშია“ ერთ-ერთი ლიდერის ბაჩუკი ქარდავას თქმით, სახელმწიფოს ყველა პრობლემის სათავე ბიძინა ივანიშვილია. მისი განცხადებით, პოლიტიკური პროცესების რადიკალიზაცია გარდაუვალია.

„ბიძინა ივანიშვილის მმართველობა ისტორიაში შევა, როგორც ერთერთი მძიმე პერიოდი ყველა მიმართულებით - გაუსაძლისი სოციალური პირობები, კორუფცია, სოფლებსა და ქალაქებში უპრეცედენტო დიდი რაოდენობით დაცლილი ოჯახები, სოფლებში უამრავი წარწერა-იყიდება სახლ-კარი და ამ ვითარებაში, ერთადერთი, რაც კიდევ შეიძლება სიკეთე გაეკეთებინა ოცნებას, იქნებოდა არჩევნების გზით ხელისუფლების ცვლილება. მაგრამ აშკარაა, ივანიშვილი თვითგანადგურების გზას დაადგა და ცდილობს, ძალაუფლების უზურპაციას, სწორედ ამის გამოძახილია საპრეზიდენტო არჩევნების მიტაცების კვალდაკვალ, საპარლამენტო არჩევნების წინ შეტევა რუსთავი 2-ზე. არ გამოვა ეს საქმე. გაკოტრებული ივანიშვილის ხელისუფლების სრული დელეგიტიმაციის მომსწრენი ვხდებით და ამ პირობებში, პოლიტიკური ბრძოლის რადიკალიზაცია გარდაუვალი აუცილებლობაა! უნდა გავითვალისწინოთ, რომ რუსთავი 2-დან დაწყებული ყველა პრობლემის პირველწყარო ივანიშვილია და გამოსავალი სწორედ ამ კერპის დამხობაა, უნდა შევუტიოთ, სხვა შემთხვევაში დავკარგავთ არა მხოლოდ რუსთავს, არამედ ქართულ სახელმწიფოებრიობას. ბრძოლა ხალხთან არავის მოუგია და ქართველი ხალხის ბრძოლა ბიძინას რეჟიმის წინააღმდეგ, აუცილებლად ხალხის გამარჯვებით დასრულდება. როგორც ჩანს, ივანიშვილმა სწორედ ეს არჩევანი გააკეთა.“ - განაცხადა ბაჩუკი ქარდავამ „ნიუპოსტთან“.