მორიგი სარჩელი სასამართლოში ტელეკომპანია „რუსთავი 2“-ის წინააღმდეგ და ხელისუფლების კვალი - საკითხს მმართველი პარტიის რიგებშიც ეხმაურებიან. მმართველ გუნდში არ იზიარებენ კომპანიის წარმომადგენლების, სამოქალაქო სექტორისა და ოპოზიციის შეფასებას, რომ ნინო ნიჟარაძის უკან, რომელიც კომპანიასთან დავას გეგმავს, ხელისუფლება დგას.

დეპუტატის თქმით, დღეს ქვეყანაში მედია თავისუფალია და იმაზე თავისუფლადაც გამოხატავს აზრს, „ვიდრე ეს საზოგადოებას“ უნდა.

„ვერ გეტყვით, რა ვიცი „რუსთავი2“-ზე ზეწოლა იგრძნობა? თქვენი ეთერიდან მე მაგას ვერ ვგრძნობ და ამ კონკრეტულ მოვლენასთან დაკავშირებით არ მაქვს ინფორმაცია და პირველი ვიქნები იმ ადამიანთა შორის, ვინც მაქსიმალურად გააპროტესტებს თუკი რაიმე აკრძალული ხდება, ტელევიზიაზე ზეწოლა. ჩვენ რაც გვაქვს ეს გვაქვს, ტელევიზიები თავისუფლად გამოხატავენ, იმაზე მეტად თავისუფლადაც კი, როგორც ხშირ შემთხვევაში საზოგადოებას უნდა,“-აცხადებს რომან კაკულია.

„რუსთავი 2”-ზე ხელისუფლების მორიგი თავდასხმა დაიწყო. სამაუწყებლო კომპანიის 9 %-ის მფლობელი ნინო ნიჟარაძე დაგროვილი გადასახადების სახით კომპენსაციას ითხოვს. საუბარია ჯამში დაახლოებით 26 მილიონ ლარზე. ნინო ნიჟარაძე არხის ყოფილი დირექტორის, გოგი გეგეშიძის მეუღლეა და მისი გარდაცვალების შემდეგ მიიღო კომპანიის წილი.