"ქართულ სასამართლოს არ ვენდობით" -ნიკა გვარამია მოდავე მხარეს საქმის საერთაშორისო არბიტრაჟში განხილვას სთავაზობს

პოლიტიკა - 21:41, 06 May, 2019

865

ნიკა გვარამიას თქმით, მის წინააღმდეგ შეტანილი სარჩელის მიზანი რუსთავი2-ში დროებითი მმართველის დანიშვნა და რუსთავი2-ის, როგორც ოპოზიციური არხის გაქრობაა. ამის შესახებ ტელეკომპანია რუსთავი 2-ის გენერალურმა დირექორმა დღეს გამართულ საგანგებო ბრიფინგზე განაცხადა.

„პრეტენზიას არ გააჩნია არავითარი საფუძველი, ეს არის იმისთვის, რომ სახელმწიფოს გაუჩნდეს ფორმალური საფუძველი და წინაპირობა, რომ შემოვიდეს დროებითი მმართველით რუსთავი2-ში და მოკლას და შეცვალოს მისი ოპოზიციური სარედაქციო პოლიტიკა და მთავარი ოპოზიციური არხი გააქროს. რატომ ხდება ეს სტრასბურგის სასამართლოს წინმსწრებად სრულიად გასაგებია, რომ ეს არის იზოლაციონიზმისკენ მიმავალი გზა, სტრასბურგის სასამართლოს გადაწყვეტილება იქნება უგულვებელყოფილი, ამას ზაფხულში მოაგვარებენ, დანიშნავენ დროებით მმართველს იმგვარად, რომ მერე არაფერს აზრი აღარ ექნება. მე მოვუწოდებ იუსტიციის მინისტრ თეა წულუკიანს, რომ თავი შეიკავოს დროებით მმართველის უკანონოდ რეგისტრაციისგან და გაითვალისწინოს სტრასბურგის სასამართლოს მიერ გამოყენებული დროებითი ღონისძიება“- განაცხადა ნიკა გვარამიამ.

ნიკა გვარამის მოსარჩელე ნინო ნიჟარაძეს, რუსთავი2-ის 9%-იანი წილის მფლობელს ნიკა გვარამია სთავაზობს სარჩელი საერთაშორისო არბიტრაჟში განიხილონ, რადგან რუსთავი2 ქართულ სასამართლოს არ ენდობა:

„თუ ეს დავა არის ორ ბიზნესსუბიექტს შორის დავა და რეალური წინაპირობა არის ზიანის ანაზღაურება, ეს აბსურდია, მაგრამ ჩავთვალოთ, რომ ასეა. მე ვთავაზობ ქალბატონ ნიჟარაძეს გამოიტანოს სარჩელი ქართული სასამართლოდან და შეიტანოს ნებისმიერ საერთაშორისო არბიტრაჟში. ვიდავოთ როგორც მხარეებმა იმ სასამართლოში, რომლისაც ორივე მხარეს გვჯერა, ჩვენ რუსთავი2 ქართულ სასამართლოს ცხადია, რომ არ ვენდობით, გვაქვს ამის გამოცდილება და წინაპირობები და ვიცით ეს რითიც დამთავრდება. უნდათ საქართველოში შევქმნათ სანდო პირებისგან არბიტრაჟი უნდათ საერთაშორისო არბიტრაჟში.“- განაცხადა ნიკა გვარამიამ.