ივანიშვილების ოჯახის ახლობელი სუს-ის უფროსის მოადგილედ ინიშნება - შენგელი ფიცხელაური ადასტურებს, რომ მისი კანდიდატურა განიხილება

პოლიტიკა - 18:56, 06 May, 2019

1551

შევარდნაძის მმართველობის მაღალჩინოსანი,შენგელი ფიცხელაური, რომელიც შესაძლოა უახლოეს მომავალში "ქართული ოცნების" მაღალჩინოსანი გახდეს, ბიძინა ივანიშვილის ოჯახის ნათესავია. არსებული ინფორმაციით, შენგელი ფიცხელაურის ვაჟი, ვაჟი, ნიკა ფიცხელაური ბერა ივანიშვილის ქვისლია.

შენგელი ფიცხელაურის თქმით, ამ ეტაპზე გადაწყვეტილება არ აქვს მიღებული.

„ვარ უნივერსიტეტის დეკანი, იურიდიული ფაკულტეტის, მინისტრის მრჩეველი და ისე, რომ მე ძალიან გულით მინდოდეს და აბა, ჩქარა დამნიშნეთ, ასე არ არის, ვფიქრობ მეც, რა თქმა უნდა,“ - განაცხადა შენგელი ფიცხელაურმა.

"კურიერის" ინფორმაციით, სუს-ის უფროსის მოადგილედ შენგელი ფიცხელაური ინიშნება. ის უშიშროების სამსახურში, საგამოძიებო მიმართულებას 1998 წლამდე ხელმძღვანელობდა.

შენგელი ფიცხელაურს ძალოვან უწყებებში მუშაობის მრავალწლიანი გამოცდილება აქვს. ჯერ კიდევ საბჭოთა ხელისუფლების დროს, 1976 წლიდან ის მუშაობდა შინაგან საქმეთა სამმართველოში სხვადასხვა პოზიციებზე. 1991 წლიდან ფიცხელაურმა იუსტიციის სამინისტროში გადაინაცვლა. იყო ისნის რაიონის სასამართლოს თავმჯდომარე. შენგელი ფიცხელაურს შევარდნაძის მთავრობის დროს სახელმწიფო უშიშროების სამინისტროში საგამოძიებო სამსახურის უფროსის თანამდებობა ეკავა. ხელისუფლების ცვლილების შემდეგ მან საგანმანათლებლო საქმიანობა დაიწყო. ის ასევე არის სპორტსმენი ძიუდოისტი.