"თუ ქობულია დაარღვევს სიჩუმეს და რამე დამატებით სიახლეს იტყვის, ურეაქციოდაც ვერ დავტოვებთ"

"თუ ქობულია დაარღვევს სიჩუმეს და რამე დამატებით სიახლეს იტყვის, ურეაქციოდაც ვერ დავტოვებთ" - რომან კაკულია

პოლიტიკა - 14:25, 06 May, 2019

679

დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია მზადყოფნა გამოთქვა, გიორგი ქობულიას კომიტეტში მიწვევის საკითხი კომიტეტის წევრებთან განიხილოს.

კომიტეტის სხდომაზე გიორგი ქობულიას მოსმენა ფრაქცია „ნაციონალური მოძრაობის“ თავმჯდომარემ რომან გოცირიძემ მოითხოვა. რომან გოცირიძის წინადადებით, კომიტეტმა უნდა განიხილოს, როგორც ეკონომიკის ყოფილი მინისტრის მუშაობის შედეგები, ასევე მისი თანამდებობიდან გათავისუფლების მიზეზები.

„თუ ადამიანს აქვს სურვილი და არის იმ განწყობაზე, რომ გარკვეულ სიახლეებზე და ახალ გარემოებებზე ჟურნალისტებთან, კამერის წინ ისაუბროს, შეუძლია მოვიდეს და ისაუბროს კომიტეტში. ამაზე თვალის დახუჭვის საჭიროებას მე ვერ ვხედავ, რადგან ის თავის სათქმელს მაინც იტყვის. გიორგი ქობულიამ საკუთარი ხედვები პარლამენტში წარმოადგინა და მიმაჩნია, რომ ის ამ ხედვებს მიზანმიმართულად მიჰყვებოდა. თუკი გიორგი ქობულია დამატებითი ინფორმაციების გაჟღერებას დააპირებს, ამაში ცუდი არაფერია. თუკი ქობულიას სურს ისეთი რამ თქვას, რაც მისი აზრით გათავისუფლებაში გადამწყვეტი იყო, ეს მისი უფლებაა. მე პირადად, ბატონ ქობულიასთან პრობლემები არ მქონია. ხედვებს რაც შეეხება, ის მოვიდა პარლამენტში, წარმოადგინა თავის ხედვა და მე ვფიქრობ, რომ ის მიზანმიმართულად ამას მიყვებოდა. რადგან პრემიერმა ჩათვალა საჭიროდ, რომ მეტი დეტალების გახმოვანება მათ შორის შემდგარ საბოლოო გადაწყვეტილებაზე არ იყო საჭირო, დავტოვეთ ეს მის პრეროგატივად. მაგრამ თუ ბატონი ქობულია დააპირებს, რაღაც დამატებითი ინფორმაციების გაჟღერებას, თავისთავად ცხადია ეს გახდება საფუძველი დამატებითი კითხვების. ამაში არაბუნებრივი არაფერია და მე ვფიქრობ, რომ ეს სიჩუმე თუ მათი ორმხრივი შეთანხმების საგანი არ არის და ქობულია დაარღვევს ამ სიჩუმეს და რამე დამატებით სიახლეს იტყვის, ახლა, ურეაქციოდაც ვერ დავტოვებთ.“- განაცხადა რომან კაკულიამ.