"რუსეთს ეძლევა მონოპოლია... ეს არის ჩვენი ქვეყნის ეროვნული უსაფრთხოების საკითხი" - ბაქრაძე "როსნეფტის" შემოსვლასა და ენერგო ოკუპაციის საფრთხეებზე

პოლიტიკა - 13:33, 06 May, 2019

689

გავრცელებულ ინფორმაციას იმის შესახებ, რომ „როსნეფტი“ საქართველოში ბენზინგასამართი სადგურების ყველაზე დიდ ქსელს „ვისოლს“ ყიდულობს, „ევროპული საქართველოს“ ლიდერი დავით ბაქრაძე გამოეხმაურა. ბაქრაძის განცხადებით, თუ ეს განხორციელდა, რუსეთი საქართველოში საწვავის ბაზრის მონოპოლისტი გახდება და პუტინის გარემოცვა ხელში ჩაიგდებს ქვეყნის, როგორც ეკონომიკურ, ასევე პოლიტიკურ ბერკეტებს.

„თავისთავად ინვესტიცია პრობლემა არ არის, პრობლემა ჩნდება მაშინ, როდესაც ინვესტიცია გადაიზრდება მონოპოლიაში და ჩვენ კარგად ვიცით, რომ მონოპოლიას რუსეთი ყოველთვის იყენებს პოლიტიკური ზეწოლის ამოცანებისთვის. იმ პირობებში, როდესაც ქართულ ბაზარზე უკვე მოქმედებს ლუკოილი, უკვე მოქმედებს „გალფი“, როსნეფტის მიერ „ვისოლის“ ყიდვა შექმნის რუსულ მონოპოლიას ქართულ საწვავის ბაზარზე, რასაც რუსეთი აუცილებლად გამოიყენებს პოლიტიკური მიზნებისთვის. ამიტომ, აქ არ ვსაუბრობთ ინვესტიციაზე, აქ ვსაუბრობთ იმაზე, რომ რუსეთს ეძლევა მონოპოლია ქართულ ბაზარზე და რუსული მონოპოლია ვიცით, რომ ყოველთვის არის ხიფათის შემცველი. გარდა ამისა, როსნეფტი არის კომპანია, რომელიც ღიად ოპერირებს ოკუპირებულ აფხაზეთში, რომელიც ღიად არღვევს ოკუპაციის შესახებ საქართველოს კანონს და ეს არის ჩვენი ქვეყნის ეროვნული უსაფრთხოების და ეროვნული ღირსების საკითხი, რომ ასეთ კომპანიებს არ ჰქონდეთ საქართველოში ოპერირების და შესყიდვების გაკეთების შესაძლებლობა,“ - განაცხადა დავით ბაქრაძემ.