"შეცდომებისკენ მივდივართ... არ იყო სპეცოპერაცია დაგეგმილი, რომ ეს გათვლილი ყოფილიყო" - გომელაურის პირველი კომენტარი პანკისის მოვლენებზე

პოლიტიკა - 20:16, 03 May, 2019

1114

საქართველოს სახელმწიფო უსაფრთხოების სამსახურის ხელმძღვანელმა პანკისში 21 აპრილს მომხდარ მოვლენებთან დაკავშირებით კომენტარი გააკეთა, ვახტანგ გომელაურის თქმით ეს სპეცოპერაცია დაგეგმილი და გათვლილი არ იყო:

„სხვანაირად უნდა შევხედოთ ამას, ეს არ იყო სპეცოპერაცია დაგეგმილი, რომ ეს გათვლილი ყოფილიყო, ესე მოხდებოდა თუ ისე მოხდებოდა, თემა იყო: შევიდა სამშენებლო კომპანია, რომელსაც შეჰყვა 30-35 პოლიციელი, მას შემდეგ რაც მოხდა დაძაბვა, მას შემდეგ მოხდა შეყვანა განსაკუთრებულ დავალებათა დეპარტამენტის . იქ როგორ განვითარდა თემა ამას ანალიზი უნდა გაუკეთდეს, ან უფრო მეტი უნდა შეეყვანათ, შეგვეყვანა ერთად, სადაც უნდა შესულიყვნენ-გამოსულიყვნენ სხვა თემაა, ანალიზია გასაკეთებელი. რა თქმა უნდა ცუდი ფაქტი მოხდა. ჩვენც ჩართულები ვიყავით რა თქმა უნდა, იმიტომ რომ ქვეყნის უსაფრთხოებაზე ჩვენ ვზრუნავთ და ასევე ჩვენ შინაგან საქმეთა სამინისტროს გარეშე ვერაფერს გავაკეთებთ.“- განაცხადა გომელაურმა.

მისი თქმით, ის იზიარებს შს მინისტრის შეფასებას, რომ შეცდომები იქნა დაშვებული:

"რა თქმა უნდა ვიზიარებ, იქიდან გამომდინარე, რაც მოხდა ფაქტი, პოლიციელი დაშავდა, მოქალაქე დაშავდა... რა თქმა უნდა შეცდომისკენ მივდივართ. რაღაც, სად რა გაიპარა, ამის ანალიზს გავაკეთებთ და ვიტყვით - ეს იყო შეცდომა, ან არ იყიო შეცდომა, ძალოვნების შეცდომა იყო თუ ვისი შეცდომა იყო.“- აღნიშნა სუს-ის ხელმძღვანელმა.

გომელაურმა უარყო გავრცელებული ინფორმაცია იმის შესახებ, რომ მასსა და გიორგი გახარიას შორის დაპირისპირებაა:

„არანაირი დაპირისპირბა არაა გიორგი ჩემი ძალიან კარგი, დიდი ხნის მეგობარია, მარტო ჩვენ არა ჩვენი უწყებების ერთმანეთის გარეშე მუშაობაც ურთულესი იქნება.“-განაცხადა გომელაურმა.