"უცნაურია ის, რომ ამ საფრთხეზე საუბრობს ივანიშვილის უსაფრთხოების სამსახურის უფროსი ბატონი გომელაური"

"უცნაურია ის, რომ ამ საფრთხეზე საუბრობს ივანიშვილის უსაფრთხოების სამსახურის უფროსი ბატონი გომელაური" - სალომე სამადაშვილი

პოლიტიკა - 18:52, 03 May, 2019

1032

სახელმწიფო უსაფრთხოების სამსახურის მიერ დასახელებულ მთავარ გამოწვევებს შეფასებები მოჰყვა. ოპოზიციის თქმით, ის რომ უცხო ქვეყნის სპეცსამსახურები ქვეყანაში საგარეო კურსის ცვლილებას და ეთნიკურ და რელიგიურ ჯგუფებს შორის შუღლის გაღვივებას ცდილობენ, რეალურია და საზოგადოებამ ისედაც კარგად იცის. რას უპირისპირებს ამ საფრთხეებს სახელმწიფო უსაფრთხოების სამსახური, ოპოზიციის თქმით, ისევ პასუხგაუცემელია.
„ეს საფრთხე რომ არსებობს, ჩვენ რა თქმა უნდა, ვიცით. უცნაურია ის, რომ ამ საფრთხეზე საუბრობს ბიძინა ივანიშვილის უსაფრთხოების სამსახურის უფროსი ბატონი გომელაური, როდესაც ივანიშვილისვე გადაწყვეტილებით, დღეს საქართველოს ჰყავს პრეზიდენტი, ქალბატონი სალომე ზურაბიშვილი, რომელიც თავად აჟღერებს იმ გზავნილებს, რომელიც ძალიან ხშირად არის სწორედ რუსეთის რბილი ძალის გავლენის გზავნილები. ვიცით, დიდი ხანია, რომ რუსეთი ცდილობს ეთნიკურ და რელიგიურ საფუძველზე გააჩინოს ქვეყანაში კონფლიქტები. კიდევ ერთხელ ბატონ გომელაურთან შეკითხვა არის, რა გააკეთა სახელმწიფომ იმისთვის, რომ ამას ხელი შეუშალოს. მაგალითად, როდესაც ამბობენ, რომ დავით გარეჯთან დაკავშირებით კომისია აღარ მუშაობს უკვე მრავალი წელიწადია და რეალურად უკვე პრობლემა დარჩა და დღეს ამ პრობლემის გამოყენება ხდება სწორედ შესაძლო დაპირისპირების ინსპირირებისთვის, ვინ არის ამაზე პასუხისმგებელი. როდესაც ჩვენ ვსაუბრობთ პანკისში შექმნილ ვითარებაზე, ვინ არის პასუხისმგებელი ამ ვითარებაზე - არის ხელისუფლება,“ - განაცხადა პარლამენტის ფრაქცია „ნაციონალური მოძრაობის“ თავმჯდომარის მოადგილემ, სალომე სამადაშვილმა.
შეგახსენებთ, რომ სახელმწიფო უსაფრთხოების სამსახურის უფროსმა, ვახტანგ გომელაურმა, გასული წლის ანგარიში და მისი ძირითადი მიმართულებები წარადგინა. სუს-ის ხელმძღვანელი გამოწვევებს შორის ჰიბრიდულ ომს და ყალბ ახალ ამბებს ასახელებს. გარდა ამისა, გამოწვევებს შორისაა საგარეო პოლიტიკური კურსის ცვლილების მცდელობაც უცხო ქვეყნის სპეცსამსახურების მხრიდან.

ვახტანგ გომელაურის თქმით, უცხო ქვეყნების სპეცსამსახურები, საქართველოში მცხოვრები ეთნიკურ და რელიგიურ ჯგუფებს შორის დაპირისპირების მიზნით, მედიასაშუალებებსა და სოციალურ ქსელებს აქტიურად იყენებენ.