მმართველი პარტიის შტაბში დაჭრილი აქტივისტი - ბრალდებულმა ოკუპირებულ აფხაზეთში გადასვლა მოასწრო და ხელისუფლებისგან საარჩევნოდ მითითებებს ელოდება?

კრიმინალი - 14:50, 03 May, 2019

1970

სამართალდამცავებს 28 წლის ალიკა ლაგვილავას დაჭრაში ბრალდებული ბეჟან გვაზავა ამ დრომდე არ დაუკავებიათ.

ზუგდიდის რაიონის სოფელ გრიგოლიშში "ნიუპოსტს" უთხრეს, რომ "ქართული ოცნების" აქტივისტმა გვაზავამ სავარაუდოდ ოკუპირებულ აფხაზეთში გადასვლა მოახერხა.
ალიკა ლაგვილავა მედიასთან არ კონტაქტობს, მისი თანასოფლელები კი პირად საუბარში აცხადებენ, რომ 28 წლის ახალგაზრდა მისივე თანაპარტიელსა და დაჭრაში ბრალდებულს საკუთარი ძალებით ეძებს, რომ შური იძიოს.
სოფელში ამბობენ იმასაც, რომ შესაძლოა ხელისუფლება გვაზავას გაურიგდა და მის კრიმინალურ გავლენებს 19 მაისის არჩევნებში გამოიყენებს.
შინაგან საქმეთა სამინისტრომ ზუგდიდში ახალგაზრდა მამაკაცის სხეულის დაზიანების ფაქტზე გამოძიება 19-108 მუხლით დაიწყო, რაც განზრახ მკვლელობის მცდელობას გულისხმობს. უწყებაში აღნიშნავენ, რომ სამართალდამცველების მიერ დანაშაულის სავარაუდოდ ჩამდენი პირის ვინაობა დადგენილია, მიმდინარეობს აქტიური საგამოძიებო-ოპერატიული ღონისძიებები მისი დაკავების მიზნით.
"ნიუპოსტმა" გაარკვია, რომ 18 აპრილს სოფელ გრიგოლიში მომხდარი სისხლიანი გარჩევა პარტიული ფინანსებისა და გავლენების გადანაწილებას უკავშირდება.

ლაგვილავას ბებია ჩვენთან საუბარში აღნიშნავდა, რომ გვაზავა მის შვილისშვილს უყვიროდა - "შტაბს დავხურავ, და ყველაფერს თავდაყირა დავაყენებო".

საქმე რომ გავლენების მოპოვებასა და გზის რეაბილიტაციის საკითხს უკავშირდება, ადასტურებს იმ კერძო საუთრების მფლობელი, სადაც ,,ქართული ოცვნების" შტაბი იყო გახსნილი.

გრიგოლიშში აღნიშნავენ, რომ გვაზავა ხშირად გადაადგილდებოდა იარაღით, მათ შორის შტაბშიც და ამის შესახებ ყველამ იცოდა.

თვითმხილველთა თქმით, 28 წლის ბიჭისთვის ცეცხლის გახსნის შემდეგ, გვაზავამ იარაღის მუქარით, მძევალთან ერთად დატოვა შემთხვევის ადგილი და მას შემდეგ არავის უნახავს.