დავით გარეჯში არსებული დაძაბული სიტუაცია - სასულიერო პირები ადგილზე არსებულ ტაძრებში ყოველდღიურად აღავლენენ ღვთისმსახურებას.

გუშინ მეუფე იობმა განაცხადა, რომ შესაძლოა საქმე მივიდეს სისხლისღვრამდე. მეუფე იობის აღნიშნულ განცხადებას საპატრიარქო გაემიჯნა.

საკითხზე კომენტარი დღეს ვანისა და ბაღდათის მიტროპოლიტმა მეუფე ანტონმაც გააკეთა და განაცხადა, რომ იგი არც კი უშებს, რომ საქმე შესაძლოა სისხლისღვრამდე მივიდეს:

“იქამდე ღმერთმა ნუ მიგვიყვანოს და მე არც ვუშვებ რომ მივა, ქვეყანა ჩალით ხომ არ არის დახურული? როგორიც არის ყველა ქართველის პოზიცია, ისეა ჩემი პოზიციაც, აქამდე არ უნდა მოსულიყო, როგორც ჩანს, რაღაც გამოგვეპარა, მთავრობას გამოეპარა, ბევრი პრობლემებია, ვერ განვსჯი და სახელმწიფო უწყებებს ვერც მოვთხოვ, იმას ვხედავ, რომ ძალიან დაძაბულია მდგომარეობა, მოვლა და შველა უნდა. ქვეყნის დალაგება ჩვენი საკითხი არ არის, მაგრამ ეს არ ნიშნავს, რომ არ გვტკივა და არ ნიშნავს, რომ არ გვეხება სამოქალაქო საკითხები. სასულიერო პირამდე ჩვეულებრივი მოქალაქე ვარ და ჩვეულებრივად მტკივა ჩემი ქვეყნის საკითხები“, - აცხადებს მეუფე ანტონი.

მეუფე ანტონმა მეუფე იობის განცხადებას "გულანთებული ადამიანის სიტყვები" უწოდა. "ვიცი რაც თქვა, ეს არის გულანთებული კაცის საუბარი. იმ დროს არ ფიქრობდა, რომ ის არის სახელმწიფოებრივი და საზოგადო. ის ფიქრობს მისი "მე"-ს და პიროვნებიდან გამომდინარე" -განაცხადა მიტროპოლიტმა.