"ჩვენი მეზობელი სახელმწიფო უხეშად არღვევს ჩვენს საზღვრებს... არავის დაუთმობთ"- მეუფე გიორგი დავით გარეჯის საკითხზე

პოლიტიკა - 10:05, 03 May, 2019

1449

დავით გარეჯის სამონასტრო კომპლექსთან დაკავშირებით შექმნილ ვითარებასთან დაკავშირებით მროველ-ურბნელი მიტროპოლიტი იობის (აქიაშვილი) ქადაგების შემდეგ, რა დროსაც მან ისლამოფობიური და აგრესიული მესიჯები გააჟღერა და აქცენტი რელიგიურ კობფლიქტზე გააკეთა, აღნიშნულ თემას მარნეულისა და ჰუჯაბის ეპისკოპოსი გიორგიც (ჯამდელიანი) გამოეხმაურა. მან მიტროპოლიტი იობის მსგავსად აზერბაიჯანი საქართველოს საზღვრების დარღვევაში დაადანაშაულა და განაცხადა რომ მიწის დასაცავად უპირველესად სამღვდელოება წავა:

„დღეს მისიუწმინდესობის ლოცვა კურთხევით, მაღალყოვლადუსამღვდელოესმა მიტროპოლიტმა იობმა სამღვდელოებასთან ერთად საღმრთო ლიტურგია აღავლინა დავით გარეჯის ლავრაში კერძოდ თხემზე სადაც ეწამა ექვსიათასი გარეჯელი ბერი, მინდა შეუერთდე მათ სულისკვეთებას და ჩვენთანამემამულეებთან ერთად შევთხოვო ღმერთს რათა დაიცვას და განამტკიცოს“საზღვარნი საქართველოისანი”. დავით გარეჯი იყო არის და იქნება ჩვენი ქვეყნის განუყოფელი ნაწილი, ბერ -მონაზვნობის სულიერი აკვანი და ჩვენი იერუსალიმი.

მე როგორც მარნეულის ეპისკოპოსმა მინდა ვთქვა რომ, ვხედავ თუ როგორ ზრუნავს ხელისუფლება ჩვენთან მცხოვრები აზერბაიჯანელ მოსახლეობაზე რათა ისინი იყვნენ სრულუფასოვანი წევრები საზოგადოების. მიუხედავად მათი ეთნიკური თუ რელიგიური კუთვნილებისა, მათ აქვთ ყოველგვარი პირობები მშვიდობიანი თანაცხოვრებისა ჩვენს ხალხთან. სამწუხაროა რომ ჩვენი მეზობელი სახელმწიფო ამ და სხვა კონტექსტსაც არ ითვალისწინებს და უხეშად არღვევს ჩვენს საზღვრებს. ერთი იცოდეს ყველამ შინაურმაც და გარეულმა არავის დაუთმობთ ჩვენ წინაპართა სისხლით მორწყულ მიწას , უპირველსად სამღვდელოება წავალთ და ჩვენს მკერდს მიუშვერთ მომხდურთ, წინაპართა დარად!

იმედია ჩვენი მეზობელი სახელმწიფო დაუყოვნებლივ მიიღებს სწორ გადაწყვეტილებას და ჩვენს კეთილმეზობლურ, ძმურ ურთიერთობებში არ გააჩენს ბზარს!“- განაცხადა ეპისკოპოსმა გიორგიმ.