პანკისის ხეობაში მომხდარი დაპირისპირება - პარლამენტში „მინისტრის“ საათის ფარგლებში მისულ გიორგი გახარიას რამდენიმე მწვავე კითხვა დაუსვეს აღნიშნულ საკითხთან მიმართებით.

შინაგან საქმეთა მინისტრის თქმით, პანკისის ხეობაში არა სპეცრაზმი, არამედ სამინისტროს დამატებითი ძალები იყო მობილიზებული და ისინი მუშაობდნენ, მხოლოდ მოქალაქეების უსაფრთხოების დასაცავად:

„სპეცრაზმით ჩვენ თურმე სადღაც შევვარდით, ერთი რამე უნდა გვესმოდეს, ქვეყნის უსაფრთხოების, მართლწესრიგის საკითხი არის ყველანაირ პარტიულ ინტერესზე უფრო მაღალი საკითხი, როდესაც ისეთ სათუთ თემებს ვიყენებთ პოლიტიკური ტემპერატურის ან ქულების გამო, ჩვენი პოზიცია არის შემდეგი, როდესაც ჩვეულებრივი სოციალური პროტესტი იძენს ისეთ განმარტებებს რომელიც შეიძნა აქ, არის სამწუხარო.

თემა უნდა დაიყოს რამდენიმე ნაწილად, რაც ხდებოდა 21 აპრილამდე, 21 აპრილი და მისი შემდგომი რეაქცია. ის რაც ხდებოდა 21 აპრილამდე ეს არის ჰესის მშენებლობა, რომელზეც გაცემული იყო ნებართვა, გარკვეული სამუშაოები მიმდინარეობდა, ეს იყო სხვადასხვა უწყებების კომპეტენციის ფარგლებში მუშაობა, როგორც ჩანს ამ შეფასებებში შეცდომა იყო გაპარული, შესაძლებელია, რომ არასაკმარისი კორდინაციაც იყო და ფაქტობრივად მივიღეთ ის, რაც შეიძლება ცუდ შედეგად შეფასდეს" - განაცხადა მინისტრმა.