საქართველოს შინაგან საქმეთა მინისტის გიორგი გახარიას განცხადებით, დავით გარეჯის საკითხთან დაკავშირებით უახლოეს დღეებში შეიქმნება შესაბამისი კომისია, რომელიც დემარკაციის საკითხს აზერბაიჯანულ მხარესთან თანამშრომლობით გადაწყვეტს.

ამის შესახებ შინაგან საქმეთა მინისტრმა „მინისტრის საათის“ ფარგლებში დასმული კითხვის საპასუხოდ ისაუბრა:

„საკმაოდ ფაქიზი და ფრთხილი საკითხია, ეს არის საკითხი რომელიც მძიმედ დგას 96 წლის შემდეგ, ეს არის პოსტსაბჭოთა მემკვიდრეობა, დელიმიტაცია-დემარკაციის საკითხი არის პრინციპული საკითხი, რომელიც სასწრაფოდ უნდა მოგვარდეს, კომისია იქნება დაკომპლექტებული და შესაძლებელ ვადებში უნდა ვეცადოთ, რომ ეს საკითხი ერთხელ და სამუდამოდ დაიხუროს. აზრებაიჯანი არის საქართველოს სტრატეგიული პარტნიორი, ჩვენი მოძმე ერი, დემარკაციის კომისიის მუშაობის ფარგლებში ერთად გადავწყვეტთ ყველა პრობლემას, ორი აზრი არ არსებობს, ყველა სხვა სახის შეფასება არის ქვეყნის ინტერესების წინააღმდეგ მიმართული შეფასება. ყველას უნდა გვესმოდეს, ამ ქვეყანას ჰყავს ოკუპანტი, ეს არის რუსეთის ფედერაცია და ყველაფერი უნდა გავაკეთოთ, რომ ყველა სხვა მეზობელი იყოს ჩვენი ქვეყნის სტრატეგიული პარტნიორი და არასწორი განმარტებები არის მაღალი რისკის შემცველი.

დავით გარეჯის საკითხი საზღვრის დემარკაციის ფარგლებში იქნება მეგობრული სულისკვეთებით გადაჭრილი, რომელიც მოემსახურება საქართველოს სახელმწიფოსა და ეკლესიის ინტერესებს“, - განაცხადა გიორგი გახარიამ.