შინაგან საქმეთა მინისტრის პარლამენტში მოსმენისას მას შეკითხვები ოპოზიციის წარმომადგენლებმაც დაუსვეს, „ერთიანი ნაციონალური მოძრაობის“ პოლიტსაბჭოს თავმჯდომარის ნიკა მელიას თქმით, შინაგან საქმეთა მინისტრი, რომელიც კრიმინალებთან თანამშრომლობს, ბედავს და პოლიციის დისკრედიტაციაში ოპოზიციას ადანაშაულებს:

„თქვენ ბრძანეთ ძალიან უცნაური რამ და აქცენტი ჩვენზე იყო გაკეთებული, რომ ოპოზიცია პოლიციის დისკრედიტაციის კამპანიას აწარმოებს, არადა მე გეტყვით საპირისპიროს, თუ ვინმე პოლიციის დისკრედიტაციას უწყობს ხელს ბრძანდებით პირადად თქვენ, ბატონო გახარია, რომელიც არა უბრალოდ უწყობთ ხელს, არამედ უშუალოდ თანამშრომლობთ კრიმინალებთან, ეს დადასტურდა ზუგდიდშიც და მხოლოდ ერთი ადამიანის სახელი და გვარი- ხვიჩა ცხაკაია საკმარისია, რომელზეც თქვენ თავი გამოისულელეთ და თქვით რომ არ გსმენიათ და პირადად ხართ ამ ადამიანთან შეხვედრილი. თქვენ ხართ იმ უწყების ხელმძღვანელი, რომელიც „რემენას“ აეროპორტში ხვდება, უწყების ხელმძღვანელი, რომელიც „ლავას ოღლის“ ათავისუფლებს, იმ გუნდის ერთ-ერთი თვალსაჩინო ლიდერი ხართ, რომლის რიგებშიც გახლავთ ბატონი კალაძე, თქვენი მეორე ლიდერი, რომელთანაც ურთიერთობა არ გაქვთ ტკბილი, მაგრამ ეგ თქვენი პრობლემაა, რომელიც ამაყობს 8 სული ქურდით და ა. შ და ა.შ. ამ ყველაფრის გათვალისწინებით, როგორ ბედავთ ლაპარაკს იმასთან დაკავშირებით, რომ ვინმე სხვა ახდენს პოლიციის დისკრედიტაციას. უნამუსო ადამიანის გარდა ამას ვერავინ იკადრებდა, მაგრამ თქვენ ხართ ასეთი ადამიანი.“- განაცხადა ნიკა მელიამ. მის ამ განცხადებას დარბაზში უმრავლესობის დეპუტატების მხრიდან ხმაური მოჰყვა. ნიკა მელიამ „ოცნების“ წევრებს მიმართა და განუცხადა, რომ ისინი თავისი გუნდის წევრებს მხოლოდ მაშინ იცავენ როდესაც თანამდებობაზე არიან „კვირიკაშვილი როცა პრემიერი იყო ყველა მზად იყავით დაგეცვათ, ახლა როცა აღარ არის რამდენიმე იშვიათი ადამიანის გარდა მისი ხსენებაც კი გაქვთ აკრძალული.“- განაცხადა მელიამ.