უმაღლეს საკანონმდებლო ორგანოში დეპუტატების წინაშე მინისტრის საათის ფარგლებში დღეს შინაგან საქმეთა მინისტრი გიორგი გახარია წარსდგება. პარლამენტში გახარიას 12:00 საათისთვის ელოდებიან. დეპუტატები მინისტრისთვის მწვავე კითხვების დასასმელად ემზადებიან. მთავარი კითხვები პანკისის ხეობაში დაპირისპირებას, ბოლო პერიოდში გაზრდილ კრიმინალსა და გამოუძიებელ საქმეებს შეეხება.

"რატომ და რანაირად დაიგეგმა ის ნაბიჯები, რაც გადაიდგა იმ დღეს პანკისის ხეობაში, ამაზე უნდა გაგვცეს პასუხი. ჩვენ არ დავკმაყოფილდებით რაღაც ზოგადი სადღეგრძელოებით, უნდა აგვიხსნას რატომ გადადგეს ნაბიჯი, რომელზეც მერე თვითონვე დაიხიეს უკან, ოღონდ ამ პროცესში მიაყენეს ზიანი პოლიციელებს, ჩვენი ქვეყნის ინტერესებს, მოქალაქეებს კანონის უზენაესობას, ყველაფერს,"-აცხადებს "ევროპული საქართველოს" ერთ-ერთი ლიდერი, გიგა ბოკერია.

"ნაციონალურ მოძრაობაში" კი იმედს გამოთქვამენ რომ მინისტრი საკუთარ პასუხისმგებლობას გონივრულად მიუდგება:

"თუ მაჩალიკაშვილის საქმის გამოძიებას ეძახის უმრავლესობა შოუს, ან სარალიძის საქმის გამოძიებას, ან მუხთარლის გატაცების საქმის გამოძიებას, ან ია კერზაიას სიკვდილის გამოძიებას, ან პანკისის მოვლენებს თუ ეძახის შოუს უმრავლესობა, მაშინ რა თქმა უნდა მათგან ვერაფერ ლოგიკურს ვერ მოვისმენთ. თუმცა მინისტრისგან მაინც იმედი მაქვს რომ ოდნავ უფრო გონივრულად მიუდგება მის პასუხისმგებლობას,"-აცხადებს თინათინ ბოკუჩავა.