აღსანიშნავია, რომ აღნიშნულის ამსახველი ვიდეოკადრები თავდაცვის სამინისტრომ მოგვიანებით წაშალა. დღეს კი ჩაჩიბაიამ განმარტება გააკეთა და კრიტიკულ განცხადებებს უპასუხა. მისი თქმით, არ ღირს მისი განცხადების ნაწყვეტის, სკანდალისთვის გამოყენება.

საკითხის შესაფასებლად „ნიუპოსტი“ გაერთიანებული ოპოზიცია „ძალა ერთობაშიას“ ერთ-ერთ ლიდერსა და „ეროვნულ-დემოკრატიული პარტიის“ თავმჯდომარეს ბაჩუკი ქარდავას ესაუბრა.

ქარდავამ ჩაჩიბაიას განცხადებას, სახიფათო და მოღალატეობრივი უწოდა. მისი თქმით, ჯერ კიდევ ეროვნული მოძრაობა ცდილობდა მსოფლიოსთვის დაემტკიცებინა, რომ საქართველოს კონფლიქტი ჰქონდა რუსეთთან და არა აფხაზეთთან თუ სამაჩაბლოსთან:

„ეს ძალიან სახიფათო და მოღალატეობრივი განცხადებაა, მაგრამ სანამ მას შევაფასებდი, მანამდე მსურს პატარა შესავლის გაკეთება. მე მახსენდება პირველი კონფლიქტი, რომელიც მოხდა სამაჩაბლოში, შემდეგ აფხაზეთით გაგრძელებული, ეროვნული მოძრაობა ცდილობდა მოეხერხებინა და მსოფლიოს წინაშე დაეფიქსირებინა, რომ საქმე არ ჰქონდათ ეთნო-კომფლიქტებთან, იმიტომ რომ ეთნო-კონფლიქტების ინსპირირება ხდებოდა სწორედ კრემლიდან და ეს იყო ფაქტობრივად ბრძოლა და ომი რუსეთის მხრიდან, საქართველოს სახელმწიფოებრიობისა და დამოუკიდებლობის წინააღმდეგ“, - განაცხადა ედპ-ის ლიდერმა, რომელიც გენერალური შტაბის უფროსს შეახსენებს, რომ რუსეთთან ომი ახალა არ დაწყებულა და ის 200 წელია მიმდინარეობს.

„2008 წლამდე, მთელ ქართულ პოლიტიკურ გუნდს მოუწია ბრძოლა იმისთვის, რომ მსოფლიოსთვის დაემტკიცებინა, რომ ეს არის ბრძოლა და ომი რუსეთ-საქართველოს შორის. ყველა ეგრეთ წოდებული კონფლიქტი, ყველა დაძაბულობა, რომელიც ამ ქვეყანაში ხდებოდა, განსაკუთრებით აფხაზეთსა და სამაჩაბლოში, ეს იყო ომი საქართველოსა და რუსეთს შორის. მაშინ, როდესაც გენერალური შტაბის ხელმძღვანელი მსგავს განცხადებას აკეთებს, ნამდვილად ვერ ვუწოდებ შემთხვევითობას, დარწმუნებული ვარ ასეთი ტიპის განცხადებებისთვის ასეთი მაღალი რანგის მქონე პირები წინასწარ ემზადებიან და შემთხვევით არ აკეთებენ მათ, ეს იყო ანტისახელმწიფოებრივი განცხადება.

თუ გენერალური შტაბის ხელმძღვანელმა არ იცის, მსურს ვუთხრა, რომ რუსეთ-საქართველოს ომი 2008 წელს კი არ დაწყებულა, 200 წელია მიმდინარეობს და მისი შემადგენელი ნაწილი იყო როგორც უკანასკნელი 2008 წელი, ასევე დღეს არსებული მცოცავი ოკუპაცია და ის ომები, რომლებიც გაიმართა სოხუმსა და სამაჩაბლოში, ჯერ კიდევ დამოუკიდებლობის პირველ წლებში“, - აცხადებს გაერთიანებული ოპოზიციის ერთ-ერთი ლიდერი.