შეიარაღებული ძალების გენშტაბის უფროსის სკანდალური განცხადება ოპოზიციის რიგებში შეაფასეს. საუბარია ვლადიმერ ჩაჩიბაიას განცხადებაზე, რომელმაც რუსული აგრესიის ათვლა 2008 წლიდანდ აიწყო და განაცხადა, რომ საქართველომ 3 სამოქალაქო ომი გამოიარა.

გაერთიანებული ოპოზიციის „ძალა ერთობაშიას“ ერთ-ერთი ლიდერისა და ენმ-ის პოლიტიკური საბჭოს თავმჯდომარის, ნიკა მელიას განცხადებით, ეს იყო განგებ გაკეთებული განცხადება და არა - წამოცდენა.

„ეს არ იყო წამოცდენა, ეს იყო განგებ გაკეთებული განცხადება. რუსეთის ფედერაცია რას ცდილობს ან პუტინის რუსეთი უკანასკნელი წლების განმავლობაში, რომ თქვას, ეს იყო ძმებს შორის ომი და არ ყოფილა რუსეთ-საქართველოს ომი. ამ დროს გამოდის ადამიანი, თავდაცვის ძალების მეთაური და ამბობს იმას, რასაც ამბობს პუტინი ერთი-ერთში. მეორე კითხვა, რაც მინდა, დავუსვა თავდაცვის მინისტრსაც და ამ ბატონსაც, ჩაჩიბაიასაც, მისი ამ ლოგიკით, რა გამოდის, ვეტერანთა კავშირი, რომელიც 90-იან წლებში დაარსდა, იმ ვეტერანთა კავშირში გაწევრიანებული ათასობით ვეტერანი, რომელი ომის ვეტერანები გახლავთ, სამოქალაქო ომის ვეტერანები?“ - განაცხადა ნიკა მელიამ.