საქართველო პრეზიდენტმა სალომე ზურაბიშვილმა „ამერიკის ხმასთან“ ინტერვიუში აზერბაიჯანთან საზღვრის დემარკაციის აუცილებლობაზე ისაუბრა:

„არაფერი მტკივნეული არ არის. მე რომ ვიყავი აზერბაიჯანში და სომხეთში ორივე ადგილას ვთქვი, რომ შეუძლებელია გაგრძელდეს ის, რომ ჩვენ, ასეთი მეგობრული ქვეყნები, რომლებსაც მართლაც არა აქვთ არაფერი გასაყოფი, ვერ მივიდეთ იმ საბოლოო დემარკაციამდე, რომელიც არის პირველი ნიშანი სახელმწიფოებრიობის. ჩვენ რა სახელმწიფო ვართ, თუ პრაქტიკულად არც ერთი საზღვარი არ გვაქვს. ჩემთვის და ყველასთვის, ვისაც აქვს ეს მოქალაქეობრივი გაგება, ძალიან მტკივნეული საკითხი არის და უნდა შევუდგეთ ამ საკითხს ძალიან აქტიურად, მაგრამ არა წინასწარი დათმობებით.“- განაცხადა სალომე ზურაბიშვილმა.

შეგახსენებთ, აღდგომის დღესასწაულამდე რამდენიმე დღით ადრე აზერბაიჯანელმა მესაზღვრეებმა დავით გარეჯის სამონასტრო კომპლექსის ტერიტორიის ნაწილზე, გადაადგილება შეზღუდეს.

1996 წლიდან საზღვრის დელიმიტაციაზე ორივე ქვეყანა მუშაობს, საქართველო-აზერბაიჯანის საზღვრის ზოგიერთი ნაწილი ისევ სადაოდ რჩება. ჯერ კიდევ არ არსებობს შეთანხმება სამონასტრო კომპლექსის „დავით გარეჯის“ ტერიტორიის თაობაზე.