აჭარის მთავრობის მეთაურის განცხადებას, რომ ყველა ხელმრუდე ჩინოვნიკი, რომელიც საჯარო რესურსების პარაზიტად გადაიქცევა, უნდა დაისაჯოს, ოპოზიცია ეხმაურება. ისინი რიჟვაძეს თანამდებობის დატოვებისკენ მოუწოდებენ:

„ამის აღიარება ნიშნავს, რომ მთავრობაში რეალურად არიან ადამიანები, რომლებიც ჩაფლულები არიან კორუფციაში და ნაცვლად რეგიონის მოსახლეობაზე ზრუნვისა, ისინი დაკავებულები არიან საკუთარი გამდიდრებით. ნებისმიერი ადამიანის გათავისუფლება დღეის შემდგომ ქართული ოცნების ხელისუფლებიდან ნიშნავს, რომ ეს ადამიანი არის კორუმპირებული. მან წინასწარ მოახდინა ამის დეკლარირება. ამიტომ, თუ ასეთ გარემოში უწევს და მის ირგვლივ ძალიან ბევრი ადამიანია ჩართული კორუფციაში, მთავრობის თავმჯდომარემ ეს პასუხისმგებლობა საკუთრ თავზე უნდა აიღოს და თავის გუნდთან ერთად უნდა დატოვოს თანამდებობა,“ - განაცხადა აჭარის ავტონომიური რესპუბლიკის უმაღლესი საბჭოს ფრაქცია ერთიანი ნაციონალური მოძრაობის” წევრმა, გია აბულაძემ.

მურმან დუმბაძის განცხადებით, ის მხოლოდ ახალგაზრდა კაცია სახელითა და გვარით.

„ბატონ რიჟვაძეზე იშვიათად ვაკეთებ განცხადებებს იმიტომ, რომ მიმაჩნდა, აჭარის ავტონომიას მთავრობის თავმჯდომარე არ ჰყავს იმიტომ, რომ ეს არ არის პოლიტიკური ლიდერი და პოლიტიკოსი. ეს არის ახალგაზრდა კაცი სახელით და გვარით, მეტი არაფერი. დღეს არის 30 აპრილი, მოგეხსენებათ 19 მაისს მის მშობლიურ რაიონში ტარდება არჩევნები, მერობის კანდიდატები იბრძვიან. ახლა მას მეტი დატვირთვა აქვს, ამიტომ ვიღაცას თავი გაახსენა,“ - განაცხადა პარტია ემსახურე საქართველოს დამფუძნებელმა, მურმან დუმბაძემ.