ზუგდიდის მეექვსე საჯარო სკოლის გარდაცვლილი დირექტორის ია კერზაიას შვილს ბაჩანა შენგელიას დღეს სოფელ დარცელში „ქართული ოცნების“ მხარდამჭერები დაუპირისპირდნენ და ის დედის გარდაცვალების საქმით პოლიტიკურ სპეკულირებაში დაადანაშაულეს.

ბაჩანა შენგელია „ქართული ოცნების“ ზუგდიდის მერობის კანდიდატის გეგა შენგელიას შეხვედრაზე მივიდა, სადაც მან დასვა კითხვა, ია კერზაიას გარდაცვალების საქმე არის თუ არა პოლიტიკური პროცესი.

„ნიუპოსტთან“ საუბრისას შენგელიამ აღნიშნა, რომ მისმა კითხვამ, გეგა შენგელიას მხარდამჭერები გააღიზიანა და მათ პროვოკაცია მოაწყვეს:

„ქართული ოცნების რამდენიმე მხარდამჭერმა პროვოკაცია მოაწყო, ჩვენ ვიყავით ია კერზაიას სოფელში და გეგა შენგელიას დავუსვი კითხვა იყო თუ არა ეს პოლიტიკური პროცესი, მოვისმინე მათი პოზიცია, რაც ჩემთვის მიუღებელი იყო. ბოლოსკენ კონსტრუქციული საუბარი არ შედგა და კონკრეტული ადამიანები ისრების სხვაგან გადატანას შეეცადნენ“, - განაცხადა ბაჩანა შენგელიამ.