"სადაც არ მივდივართ, ყველგან იძახიან, ფულით და დაშინებით მოიგეს არჩევნებიო"

"სადაც არ მივდივართ, ყველგან იძახიან, ფულით და დაშინებით მოიგეს არჩევნებიო" - გრიგოლ ვაშაძე

პოლიტიკა - 18:14, 30 Apr, 2019

726

გაერთიანებული ოპოზიციის "ძალა ერთობაშია" ლიდერები გრიგოლ ვაშაძე და ზურაბ მელიქიშვილი, მარნეულის მერობის კანდიდატ აგილ მუსტაფაევთან ერთად სოფელ ,აღმამედლოსა და გეაგოჯალის ესტუმრნენ

ადგილობრივებმა მძიმე სოციალურ მდგომარეობაზე , გაუმართავ ინფრასტრუქტურასა და კრიმინალის ზრდაზე ისაუბრეს.

გრიგოლ ვაშაძის განცხადებით, გაერთიანებული ოპოზიციის კანდიდატს მარნეულში დიდი მხარდამჭერი ჰყავს.

მისი თქმით, ამჯერად ადგილობრივები ხელისუფლებას, 2018 წლის არჩევნებისგან განსხვავებით, ფულით და დაშინებით მოგების საშუალებას აღარ მისცემენ.

„ჩვენი საარჩევნო კამპანია მარნეულში გრძელდება და ძალიან მოხარული ვარ, რომ ამ პატრიოტი, მშრომელი ადამიანებით დასახლებულ რაიონში ერთიან ნაციონალურ მოძრაობას, გაერთიანებულ ოპოზიციას, აგილ მუსტაფაევს ფანტასტიკური მხარდაჭერა აქვს იმიტომ, რომ არაფერი ისე არ მობეზრდა ადამიანს მარნეულში და საერთოდ მთლიანად საქართველოში, როგორც ე.წ. ხელისუფლებისა, რომელიც საქართველოს წურბელასავით აზის კისერზე უკვე 7 წელიწადი არის და ნგრევის, დაპირისპირების, შუღლის, შურისძიების, პოლიტპატიმრების, ეკონომიკის უკან დახევის, ლარის განადგურების და შეურაცხყოფილი ადამიანების გარდა, არაფერი არ გაუკეთებია. ერთ რაღაცას მინდა, განსაკუთრებით ხაზი გავუსვა, სადაც არ მივდივართ, ყველგან იძახიან, ფულით და დაშინებით მოიგეს, ვითომ მოიგეს 2018 წელს არჩევნები და ყველამ ვიცით ჩვენ ეს მარნეულში და მეტი ეს აღარ გაუვათო,“ - განაცხადა ვაშაძემ.
მარნეულში არსებულ პრობლემებზე გაამახვილა ყურადღება ზურაბ მელიქიშვილმა და აღნიშნა, რომ მოსახლეობა, რომელიც სოფლის მეურნეობით არის დაკავებული, არ აქვთ სარწყავი წყალი.
"პრობლემები როგორც მთელ საქართველოში, მარნეულის რაიონში განსაკუთრებით არის. არის უგზობა, უწყლობა. მოსახლეობა მისდევს სოფლის მეურნეობას და მათ არ აქვთ სარწყავი წყალი . ნაცვლად იმისა ,რომ ჩინოვნიკები ამ პრობლემებს აგვარებდნენ საკუთარი კეთილდღეობით არიან დაკავებულნი" - განაცხადა ზურაბ მელიქიშვილმა.