აჭარის ტელევიზიის ყოფილი დირექტორი, ნათია კაპანაძე უნდობლობის საკითხზე მიღებული გადაწყვეტილების ბათილად ცნობას, თანამდებობაზე აღდგენას, განაცდურ ანაზღაურებას და დირექტორის პოზიციაზე გამოცხადებული კონკურსის ბათილად ცნობას ითხოვს.

კაპანაძე ბათუმის საქალაქო სასამართლოს დღეს მიმართავს. მის ინტერესებს საია დაიცავს.

დღეს გამართულ ბრიფინგზე ნათია კაპანაძესა და საიას თავმჯდომარე სულხან სალაძეს აჭარის ტელევიზიის თანამშრომელი დაუპირისპირდნენ. ოპერატორმა ლაშა ჯოყილაძემ არასამთავრობოები და ყოფილი დირექტორი ცრუ ინფორმაციის გავრცელებაში დაადანაშაულა. მისი თქმით, მათი გაფიცვის შესახებ ინფორმაცია არასწორი ინტერპრეტაციით გავრცელდა. ოპერატორი ამბობს,რომ ისინი ნათია კაპანაძის გადაყენების მოთხოვნით არ გაფიცულან.

აჭარის ტელევიზიის მრჩეველთა საბჭომ ტელეარხის გენერალური დირექტორი ნათია კაპანაძე თანამდებობიდან გადააყენა.