ზეწოლა საჯარო მოხელეებზე და ამომრჩევლების ზუგდიდში გადაწერა - ოპოზიციის ბრალდებებს "ოცნების” ზუგდიდის ოფისში პასუხობენ

პოლიტიკა - 12:51, 25 Apr, 2019

798

ოპოზიციის ბრალებას იმასთან დაკავშირებით, რომ „ოცნება“ საჯარო მოხელეებს ახლობლების ზუგდიდში გადაწერას ავალებს და ამით არჩევნებზე ზემოქმედებას ცდილობს, „ოცნებაში“ სიცრუეს უწოდებენ.

„ქართული ოცნების“ ზუგდიდის შტაბის ხელმძღვანელის ლაშა გვასალიას თქმით, ოპოზიციის განცხადება წინასაარჩევნოდ ჩატარებულ კვლევას მოჰყვა, რომლის მიხედვითაც მმართველი გუნდის კანდიდატს, გიორგი შენგელიას მოსახლეობის 65%-იანი მხარდაჭერა აქვს.

“ეს არის წმინდა წყლის სიცრუე. ეს ყველაფერი მოჰყვა არასამთავრობო ორგანიზაციის მიერ ჩატარებულ გამოკითხვას, რის მიხედვითაც გეგა შენგელიამ მიიღო 65 პროცენტი. სწორედ ამის გამო დაიწყო “ნაცმოძრაობამ ” ჩვეული ხრიკები, ეს არის სრული სიცრუე. პირიქით, ჩვენ გვაქვს ინფორმაცია კონკრეტულ პიროვნებებზე, რომლებიც ხალხს მობილიზებას უკეთებენ და დროებით ჩაწერებს ახორციელებენ. კი ბატონო, მათი ნებაა, ჩამოიყვანონ ჩაწერონ ადამიანები, ჩვენ არ გვეშინია. მსგავსი ხრიკები მათი მოგონილია. ყველა არჩევნებზე საზოგადოებაზე ზეწოლას გვაბრალებენ და ეს არის სიცრუე.”, – განაცხადა ლაშა გვასალიამ.