პროკურატურამ პოლიციის მიერ ნაცემი მამაკაცის გარდაცვალების საქმეზე მოწმეთა გამოკითხვები დაიწყო. სამართალდამცავებს ჯერ არ გამოუკითხავთ თავად გარდაცვლილის ოჯახის წევრები, მათ შორის არც გარდაცვლილის და, რომელსაც პოლიციელების ძალადობის შესახებ ზვიად მთავრიშვილმა პირველს მოუყვა. მთავრიშვილების განცხადებით მათი მთავარი მოთხოვნა იმ პოლიციელების დასჯაა, ვინც 55 წლის მამაკაცი სასიკვდილოდ გაიმეტა.

ზვიად მთავრიშვილი კაჭრეთის პოლიციის თანამშრომლებმა 24 მარტს ოჯახში ძალადობის საბაბით დააკავეს. ნათესავების ინფორმაციით, განყოფილებაში მიყვანამდე პოლიციელებმა ის სასტიკად სცემეს. სოფელ კაჭრეთში თავად მთავრიშვილის მონაყოლით იციან, რომ იმისთვის რომ ძალადობის კვალი არ დატყობოდა სამართალდამცავები მას ძირითადად თავში ურტყამდნენ. დაზიანებების გამო მთავრიშვილს თავში გემატომა განუვითარდა, რამაც ინსულტი გამოიწვია. ექიმებმა თავის ტრეპანაციაც გაუკეთეს, თუმცა მისი გადარჩენა ვერ შეძლეს.