სამოქალაქო მოძრაობა ბათუმის მერიაში არსებული დარღვევების შესახებ საუბრობს

პოლიტიკა - 18:27, 24 Apr, 2019

903

სამოქალაქო მოძრაობა, ბათუმის ე.წ. "გენგეგმის" კონკურსთან დაკავშირებით, მერიის მხრიდან დაშვებულ დარღვევებზე საუბრობს. ბათუმის მუნიციპალიტეტის სივრცით-ტერიტორიული დაგეგმვის დოკუმენტაციის შემუშავების კონკურსი 18 მარტს გამოცხადდა და მისი ღირებულება 1 101 694 ლარია.

სამოქალაქო მოძრაობის აჭარის წარმომადგენლობის ლიდერის გენრი დოლიძის განცხადებით, ბათუმის მერიის მხრიდან წარმოდგენილი საკონკურსო დოკუმენტაცია, შეიცავს არაერთ დარღვევასა და შეუსაბამობას,როგორც სამართლებრივი, ასევე შინაარსობრივი კუთხით,შესაბამისად ჩნდება გონივრული ეჭვი, რომ პირობები შესაძლოა მორგებული იყოს რომელიმე კონკრეტული კომპანიის ინტერესებს. ამავე დროს, სახელმწიფო შესყიდვის გამომცხადებელი არ იცნობს დღეისათვის, ქვეყანაში სივრცითი დაგეგმარების სფეროში მოქმედ ახალ კანონმდებლობას, რადგანაც საკონკურსო დოკუმენტაცია შედგენილია ძველი კანონმდებლობის მოთხოვნების შესაბამისად.

ამ მოსაზრებას მოწმობს შემდეგი ფაქტი - შესყიდვის ერთ-ერთ საგანს წარმოადგენს - ტერიტორიის გამოყენებისა და განაშენიანების რეგულირების წესების განახლება-შემუშავება. 2019 წლის 3 ივნისიდან კი ძალაში შედის ახალი კანონი „საქართველოს სივრცის დაგეგმარების, არქიტექტურული და სამშენებლო საქმიანობის კოდექსი" , რომლის მიხედვითაც ტერიტორიის გამოყენებისა და განაშენიანების რეგულირების წესების დადგენის უფლება აღარ ექნება ადგილობრივ თვითმმართველობას. ამდენად, გამოდის, რომ ის, რაშიც თითოეული ჩვენგანის ფული იქნება გადახდილი, 3 ივლისიდან ძალადაკარგული და უვარგისი იქნება. ამ და სხვა დარღვევებისა და ხარვეზების გასაჩივრების დაკმაყოფილების შემთხვევაში, სამოქალაქო მოძრაობა ელის რომ მერიას ხარვეზების გასწორება, დისკრიმინაციის აღმოფხვრა და კონკურსის ხელახალი გამოცხადება დაევალება.

"სამოქალაქო მოძრაობა ვერ დაუშვებს, რომ ფუჭად იქნას გადაყრილი ბათუმის ბიუჯეტიდან სოლიდური თანხა, უსარგებლო, გამოუყენებელი და არაკომპეტენტური დოკუმენტის შესაქმნელად მაშინ, როდესაც ურბანული განვითარების კუთხით ვდგავართ მეტად სახიფათო და ქაოტური პროცესებისა და გამოწვევების პირისპირ",აცხადებს გენრი დოლიძე.