„ეს არის ძალადობრივი საპენსიო რეფორმა - იძულებით გვახდევინებენ ფულს, რომელიც მიდის კომერციულ ბანკებში და ვინახავთ ახალ ბიუროკრატიას“- ბაქრაძე

პოლიტიკა - 14:57, 23 Apr, 2019

620

საპენსიო სააგენტოს ხელმძღვანელმა დეპუტატებს პარლამენტში 100 დღიანი მუშაობის ანგარიში გააცნო. „ევროპული საქართველოს“ ერთ-ერთი ლიდერის დავით ბაქრაძის განცხადებით, აღნიშნული რეფორმა გაუაზრებელი და ძალადობრივია. დეპუტატი აცხადებს, რომ მოქალაქეებს ყოველთვიურად თანხას ძალადობრივად ართმევენ:

„საპენსიო რეფორმამ დღეს რა მოგვიტანა, პირველი – ადამიანებს ყოველთვიურად ფულს იძულებით ართმევენ, ხელფასს უმცირებენ და ეს იძულებით ჩამორთმეული ფული კომერციულ ბანკებში მიდის. იმისთვის, რომ ჩვენი საკუთარი ფული კომერციულ ბანკებში ძალით დაგვადებინონ, სახელმწიფო კიდევ ფულს გვახდევინებს. მეორე – არ არსებობს არანაირი გეგმა და საინვესტიციო სააგენტო, უბრალოდ საპენსიო სააგენტო არსებობს. მორიგი ახალი ბიუროკრატია, რომლის შენახვაზეც თითოეული ჩვენგანი ფულს ვიხდით. მივიღეთ სურათი, როცა იძულებით გვახდევინებენ ფულს, რომ ეს ფული კომერციულ ბანკებში დაგვადებინონ და ამ დადებაში კიდევ ცალკე გადავუხადოთ. ასევე ახალ ბიუროკრატიას ვინახავთ, რომელიც ჩვენს ხარჯზე არსებობს და ძალიან მაღალი ხელფასები აქვთ“, – განაცხადა ბაქრაძემ.

მისი თქმით, აღნიშნული უწყება მავნებლური რეგულაციების მოგონებითაა დაკავებული.

„მაგალითად რეგულაცია, როგორიცაა შრომით დავებში ჩარევა და კომპანიებს მათი თანამშრომლების ხელფასების ზრდის ან შემცირების მიხედვით დააჯარიმებს. ეს არის დღევანდელი საპენსიო რეფორმა, სრულიად გაუაზრებელი, ძალადობრივი გეგმა“, – განაცხადა დეპუტატმა.