პანკისის ხეობაში მომხდარი დაპირისპირება და არსებული დაძაბულობა - საქართველოს შინაგან საქმეთა მინისტრმა გიორგი გახარიამ კომენტარი გააკეთა. მისი თქმით, იმისათვის რომ დადგინდეს მომხდართან მიმართებით ჭეშმარიტება შს სამინისტრო მაქსიმუმს გააკეთებს:

„პანკისში დილით, 08:00 საათზე წყნარად, მშვიდად იმყოფებოდა კახეთის სამხარეო პოლიციის 35 თანამშრომელი, რადგან უზრუნველყოფილიყო მშენებლების უსაფრთხოება, რისი თხოვნითაც ოფიციალურად მოგვმართა ეკონომიკის სამინისტრომ. შევიდნენ ამ ლოკაციაზე. მას შემდეგ, რაც მათზე განხორციელდა თავდასხმა, რა თქმა უნდა, მოხდა დამატებითი ძალის მობილიზება.

ჰქონდა თუ არა პოლიციის მხრიდან ადგილი უფლებამოსილების გადამეტებას, ჩვენ აქ აბსოლუტურად ტრანსფარენტულად ვიქცევით და მოვიქცევით, რადგან ჩვენთვის კრიტიკულად მნიშვნელოვანია, დავადგინოთ სრული ჭეშმარიტება.

დაძაბულობის დაწყებამდე 35 პოლიციელის გარდა ხეობაში არავინ ყოფილა. ესაა ფაქტი და შეგიძლიათ გადაამოწმოთ“,- განაცხადა გახარიამ.

პანკისის ხეობაში გუშინდელი დაპირისპირების შედეგად სამედიცინო დახმარება 55 ადამიანს დასჭირდა, მათ შორის 38 სამართალდამცველი და 17 ადგილობრივი იყო.

საუბარია დაპირისპირებაზე, რომელიც ჰესის მშენებლობის პროტესტით დაიწყო და სპეცრაზმსა და ადგილობრივებს შორის დაძაბულობით დასრულდა.