საქართველოს უმაღლეს საკანონმდებლო ორგანოში დეპუტატები სახელმწიფო უსაფრთხოების სამსახურის 2018 წლის ანგარიშს რამდენიმე საათის განმავლობაში ისმენდნენ:

მოსმენის დასრულების შემდეგ, ჟურნალისტებთან კომენტარი გააკეთა სუს-ის უფროსის პირველმა მოადგილემ. გრიგოლ ლილუაშვილმა განაცხადა, რომ აგენტურ საქმიანობასთან დაკავშირებით, საქმის წარმოება 169 პირის მიმართ მიმდინარეობს, საიდანაც 37 კრიტიკულად მნიშვნელოვანი პირია.

„მთავარია იდენტიფიცირება მოვახდინოთ, მონიტორინგი ვაწარმოოთ, მათ შორის ისეთ პირებზეც, რომლებიც შემჩნეულები არიან არა მარტო რბილი ძალის ქვეშ ყოფნაში, არამედ პირდაპირ აგენტურ საქმიანობაში და შევთანხმდით იმაზე, რომ ეს არ უნდა იყოს რაღაც პოლიტიკური ქულებისა და ბენეფიტების დასაწერი საგანი. 169 პირზე მიმდინარეობს საქმის წარმოება, მათ შორის 37 არის კრიტიკულად მნიშვნელოვანი პირი. დაკავება არ არის მთავარი მომენტი, შეიძლება განეიტრალება. მთავარია ძირგამომთხრელი საქმიანობის საშუალება არ მისცე და ქვეყნის ინტერესების დაზიანების საშუალება. ხშირ შემთხვევაში, სპეც სამსახურები იყენებენ არა გაძევების, არამედ გადმობირების მექანიზმებსაც. უამრავი მექანიზმი არსებობს...“ - განაცხადა გრიგოლ ლილუაშვილმა.