პანკისში განვითარებულ მოვლენებზე საქართველოს სახელმწიფო უსაფრთხოების სამსახურის უფროსის პირველმა მოადგილემ გრიგოლ ლილუაშვილმა განმარტება გააკეთა. სუს-მა რეგიონში სპეცრაზმის შეყვანაზე პასუხისმგებლობა მოიხსნა და ისრები შინაგან საქმეთა სამინისტროსკენ გადაიტანა. გრიგოლ ლილუაშვილის თქმით, იყო თუ არა ოპერაცია სწორად დაგეგმილი, ამაზე პასუხი შს სამინისტრომ უნდა გასცეს.

„ეს ჰკითხეთ შს სამინისტროს, ჩვენი სამსახურის მოვალეობაა ნებისმიერ რეგიონზე გვქონდეს რისკები სწორად შეფასებული, თუმცა ორგანო, რომელიც ღონისძიებას ახორციელებს ითავისებს ამ რისკებს და თვითონ იღებს გადაწყვეტილებას,“-განაცხადა ლილუაშვილმა.

ლილუაშვილი განმარტავს, რომ პოლიციელის მიმართ აგრესია განიხილება, როგორც სახელმწიფოზე თავდასხმა“

„არსებობს კვლავ რესურსი, ცენტრალური ხელისუფლების და ადგილობრივი ხელისუფლების მხრიდან, რომ ადგილობრივ მოსახლეობასთან, თემთან მოლაპარაკების გზით გადაწყდეს ნებისმიერი საყოფაცხოვრებო დონის პრობლემა. ის ფაქტი, რომ პოლიციელებს თავში ურტყამდნენ ქვებს, ხელკეტებს და სხვადასხვა ნივთებს, არის კატეგორიულად მიუღებელი. საქართველოს პოლიციელი წარმოადგენს სახელმწიფოს იქ, სადაც ის ახორციელებს კონკრეტულ მოქმედებებს და მასზე განხორციელებული ნებისმიერი აგრესია განიხილება, როგორც სახელმწიფოზე განხორციელებული თავდასხმა. ჩვენ ამას ვერ შევეგუებით ვერც პანკისში, ვერც სამეგრელოში, ვერც იმერეთში, ვერც ქართლში და ა.შ. დაზარალებულია 35 პოლიციელი და 17 მშვიდობიანი მოქალაქე. შესაბამისად თქვენ კარგად მიხვდებით, თავს იცავდა პოლიცია, თუ იერიშზე იყო გადასული“, - განაცხადა ლილუაშვილმა.