პანკისში შეტაკების ადგილზე გიორგი გახარია მივიდა. ის ადგილობრივებს მოლაპარაკებებისკენ მოუწოდებს.

"აქ ვარ და რამდენიც სალაპარაკოა იმდენი ვილაპარაკოთ. არავინ არ დაუშვებს საქართველოს მოქალაქეების უფლებების დარღვევას,"-განაცხადა გიორგი გახარიამ.

შს მინისტრი აცხადებს, რომ დილით ადგილზე მხოლოდ 35 პოლიციელი იყო, თუმცა ადგილობრივები ამბობენ, რომ ადგილზე დილიდან მაშინ, როდესაც ჰესის მშენებლობის სამუშაოები დაიწყო, სპეცრაზმი იყო მობილიზებული.

„პოლიციას ქვები რომ დაუშინეთ რა უნდა გვითხრათ?“- ასე მიმართა გიორგი გახარიამ ადგილობრივ მოსახლეობას. შს მინისტრის განცხადებით დაცული უნდა იყოს ყველა ადამიანის უფლება და მათ შორის ეს ეხება არა მხოლოდ მოსახლეობას, არამედ პოლიციელებსაც და მუშებსაც, რომლებიც ჰესის მშენებლობაზე არიან დასაქმებული. კითხვაზე, რატომ გახდა ადგილზე საჭირო დამატებითი ძალების მობილიზება, შს მინისტრი აცხადებს, რომ ეს მხოლოდ მასშემდეგ მოხდა რაც სიტუაცია დაიძაბა.

„ახლა უნდა დავჯდეთ თუ რაიმე არგუმენტი გაქვთ და სასაუბრო გვაქვს აგერა ვართ და რამდენიც სალაპარაკოა იდენი ვილაპარაკოთ. არავინ არც ერთ შემთხვევაში არ დაუშვებს არც ერთი საქართველოს მოქალაქის უფლებების დარღვევას. არც თქვენი, არც ფორმიანების და არც მშენებლების მაგრამ ამაზე უნდა ვილაპარაკოთ და მასკები უნდა მოვიხსნათ. ასე არ შეიძლება. დამატებითი ძალების შემოსვლა მოხდა მაშინ როდესაც კონფლიქტი მწვავე ფაზაში იყო შესული,“ - განაცადა გიორგი გახარიამ.