პარლამენტში უზენაესი სასამართლოს მოსამართლეების შერჩევის კანონპროექტზე ხმაურიანი დებატები გრძელდება. ოპოზიცია მმართველი გუნდის მიერ წარდგენილ კანონპროექტს კვლავ სასამართლო ხელისუფლების უზურპაციად აფასებს, რომელიც ბიძინა ივანიშვილისა და კლანის ინტერესებს ემსახურება და არა ქვეყანა.

„ნაციონალური მოძრაობის“ წევრმა, თინათინ ბოკუჩავამ აღნიშნა, რომ ხელისუფლება ცდილობს, მურუსიძე-ჩინჩალაძის კლანს უზენაესი სასამართლო ხელში ჩაუგდოს.

„თეორიულად წარმოიდგინეთ ისიც, რომ ამ მოწვევის „ქართული ოცნების“ უმრავლესობის საუკეთესო და მომავალი პარლამენტისთვის საუკეთესო ძალიან განსხვავდება ერთმანეთისგან. წარმოუდგინეთ და დაუშვით თეორიულად, ამაზეა საუბარი. ასევე მინდა, გაგახსენოთ, გასაგებია, რომ ამერიკაში უზენაესი სასამართლოს დაკომპლექტების განსხვავებული წესია, მაგრამ ჯორჯ ვაშინგტონი იყო ერთადერთი, რომელმაც 11 მოსამართლე დანიშნა ამერიკის უზენაეს სასამართლოში. მას შემდეგ არც ერთ პრეზიდენტს არ აუღია იმხელა უფლებამოსილება, რასაც დღეს იღებს თქვენი ხელმძღვანელობით საქართველოს მე-9 მოწვევის პარლამენტი. გესმით ეს საერთოდ რა პასუხისმგებლობაა? რატომ გინდათ, ამხელა პასუხისმგებლობა თქვენს თავზე აიღოთ, რომ მურუსიძე-ჩინჩალაძის კლანს ჩაუგდოთ უზენაესი სასამართლო მომავალი 30 წლის მანძილზე სრული შემადგენლობით,“ - განაცხადა ბოკუჩავამ.