უზენაესი სასამართლოს მოსამართლეების უვადოდ დანიშვნა - კანონპროექტის განხილვა დასასრულს უახლოვდება. აღნიშნულ საკითხზე პოლიტიკური დაპირისპირება უმაღლეს საკანონმდებლო ორგანოში არაერთხელ მოხდა. კანონპროექტი დეპუტატებმა დღეს მეორე მოსმენით უნდა განიხილონ.

აღსანიშნავია, რომ აღნიშნულ საკითხზე ვენეციის კომისიამ რეკომენდაციები გასცა, თუმცა, კანონპროექტის საბოლოო ვარიანტში მთავარი რეკომენდაციები ასახული არ იქნება. პარლამენტის ფრაქცია „ნაციონალური მოძრაობის“ თავმჯდომარის მოადგილე, სალომე სამადაშვილი აცხადებს, რომ უზენაესი სასამართლო კვლავ ხელისუფლების მორჩილი იქნება. მისი თქმით, საპარლამენტო უმრავლესობის წევრები მოსამართლეებად, ე.წ. კლანის წევრებს აირჩევენ.

„ვენეციის კომისიის რეკომენდაციების ნაწილობრივ, ასე ვთქვათ ტექნიკურად გათვალისწინება კანონპროექტში, არ შეცვლის იმ რეალობას, რომ უზენაესი სასამართლო დაკომპლექტდება ხელისუფლების მიერ მართული და კლანის მიერ მართული უმაღლესი იუსტიციის საბჭოს მიერ და დამტკიცდება იმ პარლამენტის მიერ, სადაც ბიძინა ივანიშვილი მართავს უმრავლესობას. ამიტომ, რეალობა, რომ ჩვენ მივიღებთ უზენაეს სასამართლოს, რომელიც იქნება ხელისუფლების პოლიტიკური კონტროლის ქვეშ. სამწუხაროდ, არ შეიცვლება იმ ცვლილებების გათვალისწინებითაც კი, რომელზეც თანახმაა დღევანდელი ხელისუფლება,“ - განაცხადა სამადაშვილმა.