საქართველოს ეკონომიკის მინისტრი თანამდებობიდან გადადგა - ამის შესახებ ინფორმაცია დღეს გავრცელდა, ასევე ვრცელდება ცნობა იმის შესახებ, რომ გიორგი ქობულიას თანამდებობიდან წასვლა აიძულეს. აღსანიშნავია, რომ ქობულია ორი დღის წინ აცხადებდა, რომ ის თანამდებობიდან წასვლას არ აპირებდა.

მმართველი პარტიიდან წასული დეპუტატი, ლევან გოგიჩაიშვილი აცხადებს, რომ პრემიერ-მინისტრმა შესაბამისი ახსნა-განმარტება უნდა გააკეთოს ქობულიას წასვლის შესახებ და საკითხით პარლამენტის ეკონომიკური კომიტეტიც უნდა დაინტერესდეს:

„მე ვიმედოვნებ, რომ პრემიერი კომიტეტზე მოვა და დაასაბუთებს ამ გადაწყვეტილებას. იმდენი საკითხია, რომ ბევრი რამის გამო შეიძლება გაეშვა მისი გადმოსახედიდან, მაგრამ ჩვენ უნდა ვიცოდეთ რეალური მიზეზი. თუ ის ვიღაცას ფეხებში ებლანდებოდა და მხოლოდ ამის გამო გაუშვეს, მაშინ პრემიერ-მინისტრიც გასაშვებია, თუ ასეთ გადაწყვეტილებებს იღებს სხვისი დაკვეთით და არა საკუთარი უფლებამოსილებებით. ჩვენ გვაინტერესებს რატომ გადადგა ქობულია, რას ერჩოდნენ, გამოვიდეს და თქვას. არ შეიძლება ამ ამბის გატარება",-განაცხადა ლევან გოგიჩაიშვილმა.