ია კერზაიას გარდაცვალების საქმე - ზუგდიდისმე-6 საჯარო სკოლის დირექტორის შვილი ბაჩანა შენგელია პროკურატურაში საქმის მასალებს გაეცნო.

როგორც შენგელიამ პროკურატურიდან გამოსვლის შემდეგ აღნიშნა, მომხდართან დაკავშირებით გამოძიება არასწორი გზით მიდის, რაც მის ეჭვებს უდასტურებს.

"დადასტურდა ეჭვი, რაზეც ამდენ ხანს ვსაუბრობდით, რომ გამოძიება მიმდინარეობს არასწორი გზით და არ არის ეფექტური ნაბიჯები გადადგმული, ვინაიდან ჩვენ ვნახეთ საქმეში, რომ მთავარი მოქმედი პირი, მიხეილ ბატიაშვილი არ არის გამოკითხული. ნაცვლად ამისა, გამოკითხულნი არიან ისეთი პირები, რომლებსაც დანაშაულზე პრაქტიკულად ვერ ექნებოდათ ინფორმაცია, მაგალითად, სკოლის დამლაგებლები, რაც აბსურდია. ასევე არ არის ამოღებული, მაგალითად, დეტალური ამონაწერები ტელეფონებიდან, არ არის ექსპერტიზისთვის სწორი კითხვებით მიმართული და შესაბამისად, საგამოძიებო მოქმედებები ჩატარებული, რაც მოგვცემდა საქმეზე ობიექტურ სურათს. მაგალითად, კამერები არ არის დროულად ამოღებული. ოთხი თვის დაგვიანებით არის მიმართვა კამერების ამოღებაზე და პასუხი არის, რომ ჩანაწერები არის წაშლილი. საუბარია ვინმე ლავრენტი ქირიაზე, რომელიც არ არსებობს და დოკუმენტურად არის დადასტურებული. შესაბამისად, ეფექტურად არ არის ჩატარებული საგამოძიებო მოქმედებები" - განაცხადა შენგელიამ.