55 წლის მამაკაცი, რომელიც ოჯახური კონფლიქტის გამო 22 მარტს დააკავეს და რომლის ნათესავებიც პოლიციას მასზე განხორციელებულ ძალადობაში ადანაშაულებდნენ, 2 კვირიანი უშედეგო მკურნალობის შედეგად გუშინ გარდაიცვალა.

ნათესავების განცხადებით პოლიციელებმა ზვიად მთავრიშვილზე ფიზიკურას იძალადეს შემდეგ კი სახლში გაუშვეს, სადაც მისი მდგომარეობა დამძიმდა და რამდენიმე დღეში, ჯერ გურჯაანის საავადმყოფოში, შემდეგ კი რეანომობილით თბილისში, ღუდუშაურის სამედიცინო ცენტრში მოხვდა. მთავრიშვილს თავზე ოპერაციის გაკეთება დასჭირდა.

აღნიშნულ საქმეს საქართველოს შინაგან საქმეთა მინისტრი გიორგი გახარია გამოეხმაურა:

„ამბის დეტალური შესწავლა, მიუხედავად იმისა, რომ პირველივე დღიდან იქ საფუძველი არ არსებობდა, თქვენ რახან მეკითხებით, დეტალურად იცით, მერამდენე დღეს მოხდა მიმართვა, როდის იყო შემთხვევა, ეს დეტალურად იქნება შესწავლილი და უახლოეს დღეებში საზოგადოებას ეცნობება,“- განაცხადა გიორგი გახარიამ.

ზვიად მთავრიშვილის ცხედარს სოფელ კაჭრეთში საკუთარ სახლში მიასვენებენ.