"ეს ყველაფერი უკავშირდება საარჩევნო პროცესის ხელის შეშლას" - ზუგდიდის ინციდენტის დროს დაკავებულების სასამართლო პროცესი 18 აპრილს ჩაინიშნა

პოლიტიკა - 19:42, 12 Apr, 2019

766

გაერთიანებული ოპოზიციის მერობის კანდიდატის სანდრა რულოვსის საარჩევნო კამპანიის დროს დაკავებული ენმ-ს ზუგდიდის საკრებულოს წევრის ანი წითლიძისა და პარტიის პრესსამსახურის უფროსის გიორგი პატარაიას საქმეზე სასამართლო 18 აპრილს იმსჯელებს. გამოძიება მათ წვრილმან ხულიგნობას და პოლიციისათვის წინააღმდეგობის გაწევას ედავება.

ანი წითლიძეს დაუკავშირდნენ სამართალდამცავები და განყოფილებაში მისვლა სთხოვეს, თუმცა ის არ აპირებს მივიდეს სამმართველოში და გამომძიებლებს პარტიის რაიონულ ორგანიზაციაში იბარებს.

„დაგვირეკეს სამმართველოდან და გვითხრეს, რომ ადმინისტრაციულ სამართალდარღვევათა ოქმი უნდა შედგეს და მივიდეთ სამმართველოში. რაზეც ვუპასუხეთ, რომ ჩვენ გვაქვს საარჩევნო კამპანია და ამიტომ მობრძანდნენ თვითონ იმიტომ, რომ ეს არის საარჩევნო კამპანიისთვის ხელის შეშლა. შემდეგ ადვოკატის ხელით გამოგვიგზავნეს საქმე და ახლა ველოდებით, როდის ჩაინიშნება ჩვენი სასამართლო. გვედავებიან დაუმორჩილებლობას, წვრილმან ხულიგნობას და სიტყვიერ შეურაცხყოფას. ყველა ეს პროცესი უკავშირდება საარჩევნო პროცესის ხელის შეშლას და ემსახურება ჩვენს განეიტრალებას რაც მათ არ გამოუვათ,“-განაცხადა ანა წითლიძემ.

წითლიძისა და პატარაიასთვის დაკავებისას ბრალი არ წარუდგენიათ, მათ პოლიციის ისე დატოვეს რომ რას ედავებოდა გამოძიება არ იცოდნენ.
შეგახსენებთ, რომ გუშინ დაძაბული ვითარება იყო სამეგრელოში , სოფელ ნაზარენში მდგომარეობა მას შემდეგ გამწვავდა სანდრა რულოვსი, მოსახლეობასთან შეხვედრას მართავდა. მთელი დღის განმავლობაში გაერთიანებული ოპოზიციის მერობის კანდიდატს სპეცსამსახურების თანამშრომლები უთვალთვალებდნენ. დღის ბოლოს შეხვედრაზე მათ ოპოზიციის წარმომადგენლებმა საბუთების წარდგენა მოსთხოვეს და დახმარებისთვის საპატრულო პოლიცია გამოიძახეს რასაც დაპირისპირება მოჰყვა. სამართალდამცავებმა სამი პირი დააკავეს, მათგან ერთის მანუჩარ ჩხეტიას სასამართლო პროცესი ამ წუთებში მიმდინარეობს.