„ქართული ოცნების“ თავმჯდომარე ბიძინა ივანიშვილი მმართვლი პარტიის რეიტინგის ამაღლებას წინასაარჩევნოდ საკუთარი ძალებით და რა თქმა უნდა, ფინანსებით ცდილობს.

საქართველოს პირველი პრეზიდენტის გარდაცვალების ადგილზე, სოფელ ხიბულაში ჩასვლის შემდეგ, ივანიშვილი ზუგდიდში ღვთისმშობლის სახელობის ტაძარს ეწვია, სადაც ოლიგარქმა განაცხადა, რომ ტაძრის მშენებლობასა და მის მოხატვაში მონაწილეობას აუცილებლად მიიღებს:

„ერთი მილიონი ვთქვი , მაგრამ არ შევჩერდები, ამაში მონაწილეობას სიამაყითაც მივიღებ“ - განაცხადა ივანიშვილმა.

დღეს ივანიშვილი სრულიად საქართველოს კათოლიკოს პატრიარქს შეხვდა, სადაც აღნიშნა, რომ იგი მზადაა სამების საკათედრო ტაძრის მოხატვა სრულად დააფინანსოს. შეხვედრის შესახებ ინფორმაცია საპატრიარქომ გაავრცელა:

„მისმა უწმინდესობამ სტუმარს სამების საკათედრო ტაძარში მიმდინარე სამუშაოებიც გააცნო, რომელიც "ქართუ ბანკიდან” ფინანსდება. ბიძინა ივანიშვილმა განაცხადა, რომ ის მზადაა სრულად დააფინანსოს სამების ტაძრის მოხატვა. შეხვედრის დასასრულს კათოლიკოს-პატრიარქმა დალოცა ბატონი ბიძინა ივანიშვილი და წარმატებები უსურვა“, - ნათქვამია ინფორმაციაში.

აღსანიშნავია, რომ ივანიშვილი პატრიარქს ბოლოს ოფიციალურად ოჯახთან ერთად შეხვდა მაშინ, როცა მისი ვაჟი ბერა დაოჯახებას აპირებდა, თუმცა, მაშინ სამების საკათედრო ტაძრის მოხატვის სრული დაფინანსება არ გახსენებია.

შეგახსენებთ, რომ საქართველოში 19 მაისს შუალედური არჩევნები უნდა გაიმართოს.