"მიიღებენ იმ კანონს და დანიშნავენ იმ მოსამართლეებს, რომლებიც მოემსახურებიან ივანიშვილის ძალაუფლების შენარჩუნებას"- გოცირიძე

პოლიტიკა - 13:47, 11 Apr, 2019

762

ოპოზიციის განცხადებით, ხელისუფლებას არ აქვს პოლიტიკური ნება, რომ სასამართლო სისტემას მურუსიძე-ჩინჩალაძის კლანი ჩამოშორდეს. ერთიანი ნაციონალური მოძრაობის წევრის რომან გოცირიძეს თქმით, ბიძინა ივანიშვილის ინტერვიუდან ნათელი გახდა, რომ მისთვის სტრატეგიული მნიშვნელობა აქვს სასამართლო სისტემის დღევანდელ მდგომარეობაში შენარჩუნებას. აღნიშნული განცხადება რომან გოცირიძემ იურიდიულ საკითხთა კომიტეტის სხდომაზე მოსამართლეთა უვადოდ დანიშვნის შესახებ ეკა ბესელიას მიერ მომზადებული კანონპროექტის განხილვასთან დაკავშირებით გააკეთა:

„ვინც ბატონი ბიძინა ივანიშვილის გუშინდელი ინტერვიუ მოისმინა, რომელსაც შეიძლება ვუწოდოთ შეგროვებული დარდების კრებული, ყველა დარწმუნდება, რომ მისთვის სტრატეგიული მნიშვნელობა აქვს სასამართლო სისტემის დღევანდელ მდგომარეობაში შენარჩუნებას. ამიტომ, გამორიცხულია, რომ ნებისმიერი სახის ალტერნატივა, მათ შორის ნუ მივეცემით ილუზიებს, თუნდაც ვენეციის კომისიის შენიშვნები იყოს არსებითად გათვალისწინებული საპარლამენტო უმრავლესობის მიერ. მიიღებენ იმ კანონს, რომელიც მოემსახურება მათი ძალაუფლების შენარჩუნებას და დანიშნავენ იმ მოსამართლეებს, რომლებიც ერთხელ უკვე იყო ასე სკანდალურად დაწუნებული საზოგადოების, არასამთვრობო თუ პოლიტიკური სექტორის მიერ.“ - განაცხადა რომან გოცირიძემ.