თბილისის საკრებულოდან უმრავლესობის დეპუტატების წასვლის ფაქტს დედაქალაქის მერი კახა კალაძე გამოეხმაურა. კალაძის თქმით, მას ჰქონდა ინფორმაცია იმის შესახებ, რომ ჯაბა ჯიშკარიანი და ვატო შაქარიშვილი საკრებულოს უმრავლესობიდან გასვლას გეგმავდნენ.

კალაძის თქმით, აღნიშნული მათი გადაწყვეტილებაა:

„ისინი რომ მიდიოდნენ ვიცოდი მე ამასთან დაკავშირებით. ჩვენ გუშინ გვქონდა შეხვედრა და მე მითხრეს ამ გადაწყვეტილებასთან დაკავშირებით. ეს მათი გადაწყვეტილებაა. ჩვენ, ყველა ადამიანი ვართ თავისუფალი ჩვენს გადაწყვეტილებებში, ჩვენს არჩევანში და შესაბამისად მათ მიიღეს ეს გადაწყვეტილება,“-განაცხადა კახა კალაძემ.

ჯაბა ჯიშკარიანმა და ვატო შაქარიშვილმა საკრებულოს უმრავლესობის დატოვების შესახებ განცხადება ცოტა ხნის წინ საგანგებო ბრიფინგზე გააკეთეს.