საქართველოს ეკონომიკის მინისტრი გიორგი ქობულია ბიძინა ივანიშვილს ეთანხმება და აცხადებს, რომ დემოკრატიის განვითარება ქვეყანაში ეკონომიკის განვითარეაბს უსწრებს. აღნიშნულის შესახებ ივანიშვილი ღია წერილში საუბრობს:

„ძალიან ხშირად ოპონენტები აპელირებენ ეკონომიკის სუსტ განვითარებაზე. ჩვენ შევინარჩუნეთ ეკონომიკური ზრდა, რეგიონში დიდი რეცესიის მიუხედავად. ძალიან დიდი მნიშვნელობა აქვს გარემოს, რომელშიც ვართ, ანუ რა ხდება ჩვენს მეზობელ ქვეყნებში. ვიცით, რომ ჩვენს მეზობელ ქვეყნებში ბოლო წლებში აღინიშნებოდა საკმაოდ დიდი რეცესია. დღესაც რომ ვნახოთ, რა ხდება რუსეთში, თურქეთში ეს ქვეყნები არის ჩვენთვის კაპიტალის წყაროები, ჩვენი თანამოქალაქეები იქ მუშაობენ, იქედან აგზავნიან ფულს საქართველოში. ინვესტორებიც ბევრი გვყავს ამ ქვეყნებიდან, ყიდულობენ ჩვენს საქონელს. რა თქმა უნდა, თუ იმ ქვეყნებში არ არის ეკონომიკური განვითარება, ჩვენთვის ძალიან ძნელია ისეთი შედეგების მიღწევა, როგორიც შეგვეძლო. მიუხედავად ამისა, ჩვენ დავდეთ ძალიან მნიშვნელოვანი შედეგი ბოლო რამდენიმე წლის განმავლობაში. რაც არის თავის მხრივ შედეგი იმ რეფორმების, რომელიც იყო გატარებული. როდესაც ვამბობთ, რომ საქართველო მეექვსე ადგილზეა მსოფლიოში ბიზნესის კეთების სიმარტივის მიხედვით, ეს ხომ არის დაფუძნებული ძალიან სერიოზულ კვლევებზე. ამის მისაღწევად ხომ იყო გატარებული მთელი რიგი რეფორმები, იგივე ბიზნესის რეგულაციები, საგადასახადო სისტემის, კორუფციის აღმოფხვრის თვალსაზრისით. ეს გვაძლევს საფუძველს ვილაპარაკოთ, რომ მიუხედავად რეგიონში არსებული რეცესიისა, ჩვენი ეკონომიკა იზრდება. რა თქმა უნდა ბევრად მეტის გაკეთება შეიძლება და ჩვენ ამის გაკეთებას ვაპირებთ“, – განაცხადა გიორგი ქობულიამ.