"დასკვნების გამოტანა ჯერ ადრეა, რთული ზომების მიღება სების მოვალეობაა"- გვენეტაძე გამკაცრებულ საბანკო რეგულაციებზე

პოლიტიკა - 15:38, 08 Apr, 2019

740

საბანკო რეგულაციები - საქართველოს ეროვნული ბანკის პრეზიდენტის კობა გვენეტაძის განცხადებით, ფინანსური რეგულაციების საერთო სურათის დანახვას მონაცემების შეფასება და ანალიზი სჭირდება, რის შემდეგაც აუცილებლობის შემთხვევაში, საჭირო ცვლილებებსაც განახორციელებენ:

„რაც შეეხება რეგულაციებს, დასკვნების გამოტანა ჯერ ადრეა. მესმის, რომ ამ ეტაპზე გარკვეული საკითხები წარმოიშვა, მაგრამ ჩვენ უნდა შევხედოთ დიდ სურათს და ახლა გავაკეთოთ ის, რაც საშუალოვადიან და გრძელვადიან პერიოდში ქვეყანას საფრთხეებს ააცილებს. მინდა, ჩვენმა საზოგადოებამ გაითავისოს, რომ ეროვნული ბანკის მოვალეობაა მიიღოს საჭირო, ზოგჯერ რთული და არაპოპულარული ზომები სისტემაში რისკების შესამცირებლად და ეს გადაწყვეტილებები თუ ნაბიჯები მნიშვნელოვანია ქვეყნის ფინანსური სექტორის განვითარებისთვის და ფინანსური სტაბილურობისთვის.

დანერგილი რეგულაციების შეფასებისას ყოველთვის უნდა გავითვალისწინოთ, რომ ეს არის გრძელვადიანი მიდგომა, რომელიც სექტორის მდგრადობას ემსახურება. ჩვენ ვცდილობთ რისკების მიტიგაციას და კრიზისის პრევენციას. ამავე დროს, მსურს საზოგადოებამ გაითვალისწონოს, რომ ორიენტირებულები ვართ გრძელვადიან შედეგებზე და არა მოკლევადიან ეფექტებზე. ასევე, ეს არის საერთაშორისო საუკეთესო პრაქტიკა და სურათის დასანახად მონაცემების შეფასება და ანალიზი გვჭირდება, რის შემდეგაც აუცილებლობის შემთხვევაში საჭირო ცვლილებებსაც განვახორციელებთ“, - განაცხადა გვენეტაძემ.