TBC-ს საქმე - „ამის წარმოდგენა თავისუფლად შეიძლებოდა საკომიტეტო ფორმატშიც და ამდენი აჟიოტაჟი, რომელმაც დაგვაზიანა, არ მოხდებოდა“- კაკულია გვენეტაძის გამოსვლაზე

პოლიტიკა - 13:40, 08 Apr, 2019

748

პარლამენტში დღეს ეროვნული ბანკის პრეზიდენტის მოსმენა გაგრძელდება, განხილვის მთავარი თემა ისევ „თიბისი ბანკის“ საქმე და საბანკო რეგულაციები იქნება. საპარლამენტო უმრავლესობის წევრის რომან კაკულიას შეფასებით არასწორი იყო როდესაც კობა გვენეტაძემ რამდენიმე ხნის წინ საკომიტეტო მოსმენაზე ამ საკითხებზე საუბრისგან თავი შეიკავა, რაც აჟიოტაჟის მიზეზი გახდა:

„თიბისი ბანკთან დაკავშირებით ჩვენი შეკითხვა იყო ერთადერთი - რა იყო აქ ისეთი, რომელიც არ შეიძლებოდა გაჟღერებულიყო საკომიტეტო მოსმენაზე და მისმა გამოსვლამ კიდევ ერთხელ დამარწმუნა, რომ ის პრინციპში ის თავის პოზიციაში საკმაოდ მყარად არის. მაგრამ ის არგუმენტები, რაც მას ჰქონდა, ამის წარმოდგენა თავისუფლად შეიძლებოდა საკომიტეტო ფორმატშიც და ამდენი აჟიოტაჟი, რომელმაც ჩემი აზრით, უბრალოდ დაგვაზიანა არ მოხდებოდა, როდესაც მას ყველა ეს არგუმენტი ჰქონდა, რომელი გუშინ ძალიან კარგად ჩანდა,“ - განაცხადა რომან კაკულიამ.

რაც შეეხება საბანკო რეგულაციებს, რომან კაკულიას თქმით, ეს გადაწყვეტილება საზოგადოების დაკვეთით მიიღეს, თუმცა მისივე განცხადებით, დღევანდელი შედეგი გონივრულად უნდა გაანალიზდეს.

„რაც შეეხება თვითონ რეგულაციებს, რეგულაციების მიღების მომენტშიც იყო გასაგები, რომ ცხადია ამას არ მოჰყვებოდა 100-პროცენტიანი დადებითი პროგრესი ყველა მიმართულებით იმიტომ, რომ ძალიან რთული გადაწყვეტილება იყო. ამ გადაწყვეტილების უკანაც საზოგადოებრივი დაკვეთა იდგა პრინციპში მაშინ, მაგრამ უნდა შეფასდეს, რა თქმა უნდა, გონივრულად და დაზღვევა ამ ადამიანების, რომელიც შედეგად მოჰყვება ამ რეგულაციებს, არ უნდა დაგვიჯდეს ჩვენ ისეთი ტიპის ეკონომიკური შემცირების ფასად, რომელმაც შემდეგ გააუფერულოს აღნიშნული ჩანაფიქრი,“ - განაცხადა რომან კაკულიამ.