უფასო ფაკულტეტები და მილიონობით გაფლანგული ლარი განათლების სამინიტროში - 2019 წლის 22 მარტს, საქართველოს სახელმწიფო აუდიტის სამსახურმა დადო დასკვნა, რომელიც ეხება უმაღლესი განათლების დაფინანსების პრიორიტეტებს, რომელიც არის დადგენილი საქართველოს განათლებისა და მეცნიერების სამინისტროს მიერ. ამ დასკვნაში წერია, რომ ეს პრიორიტეტები არ შეესაბამება შესაბამის მოთხოვნებს და არის არარელევანტური.

აუდიტის ზემოთ აღნიშნული დასკვნა გულისმობს იმას, რომ განათლების სისტემაში 6 წლის განმავლობაში 120 მილიონი ლარი გაიფლანგა, შესაბამისი სახელმწიფო სტრუქტურები კი ამაზე რეაგირებას არც ახდენენ - აცხადებს "ნიუპოსტთან" განათლებისა და მეცნიერების ყოფილი მინისტრი დიმიტრი შაშკინი.

„ორი კვირის განმავლობაში ველოდებოდი რეაქციას სახელმწიფო სტრუქტურებისგან, პირველ რიგში პროკურატურისგან, ამ დასკვნაზე. აბსოლუტური სიჩუმეა.

სახელმწიფო აუდიტის სამსახური საუბრობს ძალიან მნიშვნელოვან რამეზე - 2013 წელს გიორგი მარგველაშვილის ინიციატივით იყო გახსნილი უფასო ფაკულტეტები, ფილოსოფიის და ასე შემდეგ. ჩვენ მაშინვე აღვნიშნავდით, რომ ეს იყო შეცდომა და იყო არასწორი. ქვეყანაში ფილოსოფოსებზე მოთხოვნა არ არის, ეს ყველას ესმის, ერთი ფილოსოფოსი, თავად მარგველაშვილი, ძლივს დასაქმდა, ისიც ბიძინა ივანიშვილმა დაასაქმა. უფასოდ ათასობით ფილოსოფოსის მომზადება ქვეყანას რატომ სჭირდებოდა, გაუგებარი იყო. თუმცა, ჯიუტად, „ქართული ოცნება“ 6 წლის განმავლობაში საუბრობდა, რომ ეს არის კარგი პროექტი, გავიდა 6 წელი, დაიხარჯა 120 მილიონი ლარი, 20 მილიონი წელიწადში და ახლა სახელმწიფო აუდიტის სამსახური დებს დასკვნას, რომ ეს ფული არის გაფლანგული. 120 მილიონი ლარი არის ჰაერში გასროლილი და რეაქცია ამაზე არის ნულოვანი.

120 მილიონი ლარი გაიფლანგა იმ ქვეყანაში, სადაც მესამე პრეზიდენტს ედავებიან 4 პიჯაკის ყიდვას, ედავებიან, რომ უკრაინის პრეზიდენტს ვიზიტის დროს საპნის საფასური დაუფარეს. ოპოზიციური პარტიის ლიდერი, დავით კირკიტაძე ციხეში ზის იმის გამო, რომ ავტობუსს დაარტყა ხელი, რომელსაც არც ეწერა, რომ პოლიციის ავტობუსი იყო. ყოფილი პრემიერ-მინისტრი, ვანო მერაბიშვილი ციხეში ზის იმის გამო, რომ შედგა დასაქმების პროგრამა, რომელშიც ათასობით ქართველი დასაქმდა, ხელფასი მიიღო, თუმცა, პრემიერ-მინისტრი ამისთვის დაიჭირეს და აქ 120 მილიონი გაიფლანგა, სახელმწიფო ორგანოებისგან კი არის სრული სიჩუმე“, - აცხადებს შაშკინი.

მისივე თქმით, არსებული ხელისუფლების პირობებში სავარაუდოდ აღნიშნულის გამოძიება არ მოხდება. გაფლანგული 120 მილიონი ლარი კი საქართველოს განათლების სისტემისთვის ძალიან ბევრის მომტანი იქნებოდა:

„რას ნიშნავს ეს თანხა განათლების სისტემისთვის? - ეს არის 120 ახალი სკოლა, ეს არის ყველა იმ 40 ათასი სტატუსშეჩერებული სტუდენტისთვის განათლების საფასურის გადახდა. ბუნებრივია ჩვენ არავის არ გვაქვს იმის განცდა, რომ ამ მთავრობის ხელში მოხდება გამოძიება და დადგინდება, ეს არის არაპროფესიონალიზმის, მავნებლობის შედეგი თუ კორუფციის შედეგი. მაგრამ ფაქტი რჩება ფაქტად - 120 მილიონი ლარი დაიკარგა და ამაზე საუბრობს სახელმწიფო აუდიტის სამსახური“, - განმარტავს განათლების ყოფილი მინისტრი „ნიუპოსტთან“ საუბრისას.