„Brexit-ი საქართველოს შანსია... ევროკავშირში ადგილი თავისუფალია და ჩვენ უნდა დავიკავოთ ის“ - სალომე ზურაბიშვილის უცნაური პასუხი Bloomberg-ს

პოლიტიკა - 17:19, 05 Apr, 2019

2087

სალომე ზურაბიშვილის აზრით, Brexit-ი საქართველომ ევროკავშირში შესვლისთვის უნდა გამოიყენოს და ორგანიზაციაში დიდი ბრიტანეთის ადგილი უნდა დაიკავოს. ამის შესახებ მან Bloomberg-თან ინტერვიუში განაცხადა.

"ჩვენ ვაკვირდებით ამ სიტუიაციას, მისგან მაქსიმალური სარგებლის მიღების კუთხით. არსებობს ლოგიკა, რომ ქვეყანას, რომელიც ევროპისკენ მიზანმიმართულად მიდის, არ უნდა მოეპყრონ იმაზე ნაკლებად, ვიდრე იმ ქვეყანას, რომელიც ევროპიდან გადის“, - განაცხადა სალომე ზურაბიშვილმა.

"საქართველო ევროკავშირისკენ და NATO-სკენ 2003 წლის შემდეგ მიისწრაფის, რაც მის სათავეში მიხეილ სააკაშვილი მოვიდა, რომელმაც ყოფილი საბჭოთა რესპუბლიკა რუსეთიდან ევროპისკენ შემოატრიალა. კავკასიის სახელმწიფო ამ კუთხით დიდ წინააღმდეგობას აწყდება, რადგან ევროპას არ სურს წინააღმდეგობა გაუწიოს პრეზიდენტ პუტინს," - წერს გამოცემა.

67 წლის საფრანგეთში დაბადებულმა, საქართველოს პირველმა ქალმა პრეზიდენტმა განაცხადა, რომ საქართველო მზად არის NATO-სთვის.

"სამხედრო თვალსაზრისით ჩვემ აბსოლუტურად მზად ვართ. თუ ჩვენ მივიღებთ MAP-ს, ყველა ხვდება, რომ 2 თვეში მზად ვიქნებით,:" - აღნიშნა მან.

ზურაბიშვილი ოკუპირებულ რეგიონებსაც შეეხო და აღნიშნა, რომ რუსეთი გამყოფ ხაზთან ყოველდღიურად აწყობს პროვოკაციებს.

Bloomberg-ი აღნიშნავს, რომ სალომე ზურაბიშვილი, საქართველოში ყველაზე მდიდარი ადამიანის მილიარდერ ბიძინა ივანიშვილის მხარდაჭერით სარგებლობს და ამიტომაც გახდა პირველი არჩეული პრეზიდენტი, რომელსაც, რამდენიმე წლის წინ განხორციელებული საკონსტიტუციო რეფორმის შედეგად ფაქტიურად რეალური უფლებები არ გააჩნია.

სტატიის დასასრულს ზურაბიშვილი კიდევ ერთხელ შეეხო ევროკავშირში შესვლის შესაძლებლობას.

"ევროპა ყოველთვის აღწევდა პროგრესს სერიოზული კრიზისი პირობებში. ადგილი თავისუფალია და ჩვენ უნდა მოვიფიქროთ, როგორ დავიკავოთ ის," - აცხადებს ზურაბიშვილი.